ნეტგაზეთი • RU

აჭარის მთავრობა გოდერძიზე მიწას სასტუმროს აშენების პირობით ყიდის – აუქციონი

გოდერძის უღელტეხილზე, ბათუმი-ახალციხის ავტომაგისტრალთან, აჭარის მთავრობა 3 151 კვ.მ მიწის ნაკვეთს, სასტუმროს აშენების პირობით, აუქციონზე ყიდის. აუქციონი აჭარის ფინანსთა და ეკონომიკის სამინისტრომ გამოაცხადა.

ნაკვეთი ხულოს მუნიციპალიტეტში, სოფელ დანისპარაულის ადმინისტრაციულ საზღვრებშია და საწყისი გასაყიდი ფასი, 600 ათასი ლარია. აქ 50-ნომრიანი სასტუმრო უნდა აშენდეს.

ხედი გასაყიდი მიწის ნაკვეთიდან / გოდერძის უღელტეხილი, ხულო, სოფელი დანისპარაული / ფოტო აუქციონიდან

აუქციონის პირობა ასეთია:

  • საბოლოო საპრივატიზებო საფასურის გადახდა აუქციონის დასრულებიდან 2 ეტაპად, კერძოდ: 2022 წლის 1-ელ დეკემბრამდე საბოლოო საპრივატიზებო საფასურის არანაკლებ 25%-ის გადახდა; 2024 წლის 1-ელ ივნისამდე კი, დარჩენილი საპრივატიზებო საფასურის გადახდა;
  • შესაბამისი ნასყიდობის ხელშეკრულების გაფორმებიდან არაუგვიანეს 2 თვის ვადაში უპირობო და გამოუხმობი საბანკო გარანტიის წარმოდგენა არანაკლებ 10 000 ლარის ოდენობით, რომლის ვადაც არანაკლებ 2 თვით უნდა აღემატებოდეს საინვესტიციო ვალდებულების შესრულების ვადას;
  • არაუგვიანეს 2022 წლის 30 ნოემბრისა არქიტექტურული პროექტის მომზადებამდე სამთოსათხილამურო კურორტის ლანდშაფტის შესაბამისი საპროექტო ობიექტის ვიზუალური ესკიზის აჭარის ფინანსთა და ეკონომიკის სამინისტროში შესათანხმებლად წარდგენა;
  • არაუგვიანეს 2023 წლის 31 მარტისა საკუთრებაში გადაცემულ მიწის ნაკვეთებზე განსათავსებელი შენობა-ნაგებობის, სადაც განთავსებული უნდა იყოს არანაკლებ 50 სასტუმროს ნომერი, მშენებლობის ნებართვის მიღება;
  • არაუგვიანეს 2024 წლის 30 დეკემბრისა საკუთრებაში გადაცემულ მიწის ნაკვეთებზე განსათავსებელი შენობა-ნაგებობის მზიდი კონსტრუქციის მშენებლობის დასრულება;
  • არაუგვიანეს 2025 წლის 30 ნოემბრისა შენობა-ნაგებობის ექსპლუატაციაში გადაცემა/ამოქმედება, სადაც დასაქმებულთა არანაკლებ 90% უნდა შეადგენდეს საქართველოს მოქალაქეებს;
  • დასაქმებულთა თანაფარდობის და პროფილის შენარჩუნება ობიექტის ამოქმედებიდან არანაკლებ 15 წლის განმავლობაში;

პირობაში ასევე აღნიშნულია, რომ აუქციონში გამარჯვებულმა ამ პროექტში არანაკლებ 1 მილიონი ლარის ინვესტიცია უნდა განახორციელოს.

ელექტრონული აუქციონი, სადაც ვაჭრობის ბიჯი 15 ათასი ლარია, დაწყებულია და ის 2022 წლის 19 სექტემბერს დასრულდება.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com