ნეტგაზეთი • RU

კუპიანსკის გათავისუფლება რუსეთისთვის უდიდესი დარტყმა იქნება – ბრიტანეთის დაზვერვა

დიდი ბრიტანეთის დაზვერვა ადასტურებს, რომ უკრაინის ძალებმა ხარკოვის ოლქში 50 კილომეტრით დაახევინეს უკან რუსეთის არმიას.

„უკრაინის არმიამ ხარკოვის ოლქში კონტრშეტევა 6 სექტემბერს დაიწყო, რაც სრული მოულოდნელობა აღმოჩნდა რუსეთის ძალებისთვის. ეს სექტორი სუსტად იყო გამაგრებული და უკრაინის დანაყოფებმა აიღეს რამდენიმე ქალაქი, რამდენიმე კი ალყაში მოაქციეს,“ – წერს უწყება 10 სექტემბრის რელიზში.

დაზვერვის ცნობით, იზიუმის გარშემო მყოფი რუსეთის ძალები იზოლირებულნი არიან.

„უკრაინის დანაყოფები ახლა კუპიანსკს „ემუქრებიან“. მისი აღება უდიდესი დარტყმა იქნება რუსებისთვის, რადგან კუპიანსკი დონბასის ფრონტისთვის მთავარი ლოგისტიკური კვანძია,“ – აღნიშნავს უწყება და დასძენს, რომ იმ ფონზე, როდესაც კონტრშეტევა ხერსონშიც გრძელდება, რუსეთის დაცვის ხაზი, როგორც ჩრდილოეთის, ისე სამხრეთის ფლანგზე ძლიერი ზეწოლის ქვეშაა.

უკრაინის პრეზიდენტმა, ვოლოდიმირ ზელენსკიმ, თავის საღამოს ვიდეომიმართვაში განაცხადა, რომ ხარკოვის ოლქში უკრაინის არმიამ უკვე 30-ზე მეტი დასახლებული პუნქტი გაათავისუფლა.

_________________

ფოტოზე: უკრაინელი სამხედროები კუპიანსკთან/ფოტო: ილია პონომარენკო, ტვიტერი

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.