სასტიკი ომის მეექვსე თვეში, როდესაც უკრაინამ ძლიერი კონტრშეტევა დაიწყო, რუსეთის უკრაინაში შეჭრა შეიძლება, მხოლოდ და მხოლოდ წარუმატებლობად შეფასდეს – მიიჩნევს აშშ-ის ცენტრალური სადაზვერვო სააგენტოს (CIA) დირექტორი უილიამ ბერნსი.
The New York Times-ის ცნობით, ბერნსმა უკრაინის შესახებ ვაშინგტონში, კიბერუსაფრთხოების კონფერენციაზე ისაუბრა.
ხერსონსა და ხარკოვში უკრაინელთა კონტრშეტევის ფონზე, CIA-ს დირექტორი ფიქრობს, რომ რუსეთის პრეზიდენტმა ვლადიმერ პუტინმა სათანადოდ ვერ შეაფასა უკრაინელთა სიმამაცე და ბრძოლისუნარიანობა.
მისი აზრით, მიუხედავად იმისა, რომ ომის ფინალური თავი ჯერ არ დაწერილა, „რთულია, პუტინის სამხედრო კამპანიის მიმდინარეობა განიხილებოდეს რაიმე სხვად, თუ არა მარცხად“.
ბერნსის თქმით, პუტინი გარშემორტყმულია მრჩევლებით, რომლებიც მისთვის მცირედი წინააღმდეგობის გაწევასაც ვერ ბედავენ. რუსეთის ლიდერს შეცდომით სჯეროდა, რომ რაც უფრო დიდხანს გაგრძელდებოდა ომი, მით უფრო შეირყეოდა ევროპის სიმტკიცე, ამერიკის ყურადღება კი სხვა ამბებზე გადავიდოდა.
„პუტინი ფსონს ახლა იმაზე დებს, რომ თვითონ უფრო გამძლეა, ვიდრე უკრაინელები, ევროპელები და ამერიკელები,“ – ამბობს ბერნსი. – „მეც და ჩემს კოლეგებსაც სადაზვერვო სააგენტოში გვჯერა, რომ პუტინი ახლაც ისევე ცდება, როგორც თებერვალში, როდესაც უკრაინელთა წინააღმდეგობას არ ელოდა.“
პუტინის მცდარ ვარაუდებს, ბერნსის აზრით თავისი შედეგი აქვს:
„მხოლოდ რუსეთის არმიის სისუსტეები კი არ გამოჩნდა, არამედ გამოჩნდა ისიც, რომ ბევრად უფრო გრძელვადიანი ზიანი მიადგება რუსეთის ეკონომიკას და რუსეთის თაობებს“.
