ბათუმის სპორტულ ცენტრში სპეციალური საჭიროების მქონე ბავშვთა სპორტული სექცია გაიხსნა, სადაც გაწევრიანება უფასოა.
სპორტული ცენტრი ბათუმის მერიის ა(ა)იპ-ია, რომელიც გარდა სპეციალური საჭიროების მქონე ბავშვთა სპორტული სექციისა, სხვადასხვა სპორტული მიმართულების უფასო სექციას აერთიანებს, ისეთს, როგორიცაა: ფიგურული ციგურაობა და ყინულის ჰოკეი, ნიჩბოსნობა, ფუტსალი, ქვიშის ფეხბურთი, ქართული ჭიდაობა და ეზოს ფეხბურთი.
სპორტულ ცენტრის აქტივობები, 6-დან 16 წლამდე ასაკის სპეციალური საჭიროების მქონე, ანუ ძირითადად აუტიზმის სპექტრისა და დაუნის სინდრომის მქონე ბავშვებისთვისაა განკუთვნილი.
როგორც ბათუმის სპორტულ ცენტრში განმარტავენ, ფიზიკური აქტივობები ძირითადად სპორტული ხასიათისაა და მოიცავს თერაპიულ ნაწილსაც.
„ბავშვებთან ერთი საათის განმავლობაში კომბინირებულად მუშაობს ფსიქოლოგი, ორი მწვრთნელი და ექიმი. ძირითადი აქცენტი მაინც სპორტულ აქტივობებზე მოდის“, – გვითხრეს სპორტულ ცენტრში.
ვარჯიშები ტარდება ყოველ შაბათ-კვირას, 16:00 საათზე, ბათუმის სპორტის სასახლეში, რომელიც მდებარეობს ლეონიძის ქუჩის 15 ნომერში.
