უკრაინის გარემოს დაცვისა და ბუნებრივი რესურსების სამინისტროს ცნობით, რუსეთის მიერ დაწყებული ომი უკრაინაში ბუნებასაც აყენებს გამანადგურებელ ზიანს.
რუსული სარაკეტო დარტყმების შედეგად უკრაინაში დაიწვა ეროვნული ბუნებრივი პარკის – „ტუზლივსკი ლიმანის“ დაცული ტერიტორიის 100 ჰექტარი, პარკის თანამშრომლები კი დღემდე პოულობენ მკვდარ დელფინებს შავი ზღვის სანაპიროზე.
„წელს პარკის სანაპიროს მხოლოდ 5 კილომეტრზე, რომელზეც მეცნიერებს წვდომა აქვთ, უკვე ნაპოვნია 35 მკვდარი დელფინი. შედარებისთვის, 2021 წელს ატომური ელექტროსადგურის მთელ 44-კილომეტრიან სანაპიროზე აღმოაჩინეს მხოლოდ 3 მკვდარი დელფინი მთელი წლის განმავლობაში“ – წერს უკრაინის გარემოს დაცვისა და ბუნებრივი რესურსების სამინისტრო.
ეროვნული ბუნებრივი პარკის, ტუზლივსკი ლიმანის წარმომადგენელი, ბიოლოგიურ მეცნიერებათა დოქტორი, პროფესორი ივან რუსევი განმარტავს, რომ დელფინების სიკვდილი გამოწვეულია სონარული მოწყობილობებით შავი ზღვის გარემოს ძლიერი დატვირთვით.
„ჰიდროლოკატორების (სონარების) გამოყენების გამო იქმნება ძლიერი ხმები, რომლებიც უარყოფითად მოქმედებენ ცხოველების ჯანმრთელობაზე. დელფინები ხვდებიან გემების სანავიგაციო მოწყობილობების დასხივების ზონაში, რასაც გამოჰყავს მწყობრიდან მათი ნავიგაციისა და ექოლოკაციის ორგანოები, ისინი იღებენ ძლიერ აკუსტიკური დაზიანებას” – წერს მეცნიერი.
დელფინები სანაპიროზე
უკრაინელი მეცნიერები წერენ, რომ დელფინები სავარაუდოდ ივლისის მესამე დეკადაში დაიღუპნენ, სწორედ მაშინ, როცა რუსეთის არმიის შავი ზღვის ფლოტის ხომალდების ჯგუფი კიდევ ერთი წყალქვეშა ნავით – საკრუიზო რაკეტების მატარებლით გაძლიერდა.
„ზღვა მკვდარი ცხოველების მხოლოდ 5 პროცენტს რიყავს ნაპირზე. დარჩენილი 95% უბრალოდ მიდის ზღვის ფსკერზე და ჩვენ მათ ვერ აღრიცხავთ. ნაპირიდან მათი გამოვლენა და დათვლა არ არის შესაძლებელი, ამიტომ ჩვენ გვჯერა, რომ უკრაინის წინააღმდეგ რუსი ბარბაროსების ომის დროს უკვე ათი ათასობით დელფინი დაიღუპა“ – ამბობს ივან რუსევი.
უკრაინის გარემოს დაცვისა და ბუნებრივი რესურსების მინისტრის რუსლან სტრილეტსის განცხადებით, რუსეთის ჯარების მიერ, უკრაინის გარემოსთვის მთლიანად მიყენებული ზიანის სავარაუდო ოდენობა 962 მილიარდ გრივნაზე მეტია.
