ნეტგაზეთი • RU

ტყვეების წამებაზე რუსი სამხედრო მამასთან ტრაბახობდა, ის ჟურნალისტებმა იპოვეს 

ჟურნალისტებმა იმ რუს სამხედროს მიაგნეს, რომელიც უკრაინის სპეცსამსახურების მიერ გავრცელებულ სატელეფონო საუბრებში ოჯახის წევრებთან ტრაბახობდა, როგორ ძარცვავდნენ, კლავდნენ და აწამებდნენ ხარკოვის ოლქის მცხოვრებლებს.

როგორც პროგრამა Схемы-ს გამომძიებელმა ჟურნალისტებმა დაადგინეს, ის მე-15 ცალკეული მოტომსროლელი ბრიგადის ტანკისტი, 21 წლის სტანისლავ შტამოვია.

მამასთან ლაპარაკისას, სამხედრო ჰყვება, როგორ „მოაჭრეს ყური“ ერთ-ერთ სამხედრო ტყვეს:

„ორი ტყვე ავიყვანეთ, ერთს ყური მოვაჭერით, არ ლაპარაკობდა… ამას კიდევ არა უშავს, ნორმალურია, შუბლში ტყვია არ დაგვიხლია და ბეტეერით არ დაგვინაკუწებია. ეს კიდევ ნორმალურია, მსუბუქია… შეიძლებოდა, დაგვეყენებინა, ტყვიამფრქვევიდან მიგვეშვა და საცერივით გაეხადათ. ნუ, მაქსიმუმ, თითების დაჭრა შეიძლებოდა“.

სტანისლავ შტამოვის მამასთან საუბრის ფრაგმენტი/კადრი Схемы-ს მასალიდან

სტანისლავ შტამოვი მაროდიორობითაც ტრაბახობდა.

„ბიჭები დაზვერვაზე გავიდნენ, მოიტანეს ძეხვი, მაიონეზი, სალა… ხალხს ჩამოუარეს… იარაღი გვაქვს, ტანკები, ვინ რა ***ს გაგვიბედავს და თუ მაინც გაგვიბედავს – ერთი სახლით ნაკლები იქნება და იცხოვროს მერე ქუჩაში“.

ჟურნალისტებმა სატელეფონო საუბრებში აღწერილი ადგილმდებარეობით, ასევე მობილური ქსელების მონაცემებით დაადგინეს, რომ სამხედრო ხარკოვის ოლქში, სოფელ პესკი-რადკოვსკიში იმყოფებოდა.

მონაცემების დაზუსტების პროცესში Схемы-ს ჟურნალისტები დაუკავშირდნენ შტამოვს, რომელმაც მათ უთხრა, რომ 2 მაისს უკრაინაში დაიჭრა, ამიტომაც ახლა რუსეთშია. 21 წლის ტანკისტი თავიდან უარყოფდა სამხედრო დანაშაულებთან კავშირს, თუმცა შემდეგ აღიარა, რომ „ბრძანება იყო ასეთი“, მშვიდობიანი მოსახლეობის სახლებისთვის ესროლათ.

როდესაც რუსმა სამხედრომ შეიტყო, რომ მას „რადიო თავისუფლების“ უკრაინის ბიუროდან ურეკავდნენ, მუქარაზე გადავიდა: „თუ კიდევ ერთხელ დაურეკავ ვინმეს ჩემი ბრიგადიდან და ჩემი ბიჭებიდან, მოვალ და თავს გაგიხვრეტ, ნა*უი.“

მთავარ ფოტოზე: სტანისლავ შტამოვი/Схемы-ს კოლაჟი

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.