საბაჟო გამშვებ პუნქტებში – „სარფი“ და „ბათუმის აეროპორტი“ ხელმძღვანელები შეცვალეს

საბაჟო გამშვებ პუნქტებს – „სარფს“ და „ბათუმის აეროპორტს“ ახალი ხელმძღვანელები ჰყავს.

ფინანსთა სამინისტროს შემოსავლების სამსახურის ინფორმაციით, საბაჟო გამშვებ პუნქტ „სარფს“ ზურაბ ინასარიძე, ხოლო „ბათუმის აეროპორტს“ შოთა წულაძე უხელმძღვანელებს.

ზურაბ ინასარიძე დღემდე გამშვებ პუნქტ „კარწახის“ ხელმძღვანელი იყო. მისი სარფში გადმოყვანის შემდეგ კი, „კარწახს“ დიმიტრი ამისულაშვილი უხელმძღვანელებს.

„რაც შეეხება შოთა წულაძეს, ის ბოლოს უწყების ერთ-ერთი განყოფილების უფროსი იყო, მანამდე კი გამშვებ პუნქტ „სარფის“ ხელმძღვანელადაც მუშაობდა.

„სარფის“ და „ბათუმის აეროპორტის“ ყოფილი ხელმძღვანელებიც სხვადასხვა სამსახურებში გააგრძელებენ მუშაობას“, – გვითხრეს შემოსავლების სამსახურში.

შემოსავლების სამსახურში „ბათუმელებს“ ასევე უთხრეს, რომ „ეს პროცესი ჩვეულებრივი, შიდა როტაციაა“.