მელიტოპოლის მერის, ივან ფედოროვის ინფორმაციით, შესაძლოა, რუსები ზაპოროჟიეს ატომურ ელექტროსადგურზე ავარიისთვის ემზადებიან და ქიმიური ლაბორატორიებიც ასეთი შემთხვევისთვის სჭირდებათ.
მისი თქმით, ლაბორატორიები ქალაქის ერთ-ერთ სამედიცინო დაწესებულებაშია განთავსებული.
„ჩვენი აზრით, ეს ლაბორატორიები სჭირდებათ იმ შემთხვევისთვის, თუ რადიაციული ნივთიერებების გამოფრქვევა მოხდება ზაპოროჟიეს ატომური სადგურიდან, რომ საკუთარი გენერლები და ოფიცრები გადაარჩინონ,“ – ამბობს ფედოროვი.
25 აგვისტოს, სროლებისა და ხანძრის გამო, ზაპოროჟიეს ატომური სადგური მთლიანად გამოეთიშა უკრაინის საერთო ენერგოსისტემას.
26 აგვისტოს დილის მდგომარეობით, ყველა ენერგობლოკი გამორთული იყო ქსელიდან.
25 აგვისტოს ატომური ენერგიის საერთაშორისო სააგენტოს დირექტორმა, რაფაელ გროსიმ განაცხადა, რომ საჭიროა, სააგენტოს მისია სასწრაფოდ გაემგზავროს ზაპოროჟიეს სადგურზე.
ზაპოროჟიეს ატომური ელექტროსადგური რუსმა სამხედროებმა ომის დასაწყისში, 4 მარტს დაიკავეს.
