მთავარი,სიახლეები

ლატვიაში საბჭოთა ძეგლებს იღებენ – პოლიციამ დემონტაჟის მოწინააღმდეგეები დააკავა

24.08.2022 • 940
ლატვიაში საბჭოთა ძეგლებს იღებენ – პოლიციამ დემონტაჟის მოწინააღმდეგეები დააკავა

ლატვიის დედაქალაქში, რიგაში, პოლიციამ დააკავა საბჭოთა „განმათავისუფლებელი ჯარისკაცების“ ძეგლის დანგრევის მოწინააღმდეგეები.

აქცია რიგაში, გამარჯვების პარკში, წუხელ, 23 აგვისტოს გაიმართა. BBC-ის ცნობით, 50-ზე მეტი ადამიანი შეიკრიბა ყვავილებითა და სანთლებით, რომლებიც ძეგლის დემონტაჟს აპროტესტებდნენ. აქცია არასანქცირებული იყო, პოლიციამ აქციის მონაწილეებს დაშლისკენ მოუწოდა, თუმცა მათ უარი განაცხადეს და პოლიციამ დაახლოებით ათი ადამიანი დააკავა.

ძეგლის დემონტაჟი რიგაში გუშინ დაიწყო. რიგის მერმა განაცხადა, რომ ძეგლი დემონტაჟის შემდეგ განადგურდება.

ლატვიის ხელისუფლებამ მიიღო დადგენილება, რომლის მიხედვითაც ტოტალიტარული რეჟიმების განმადიდებელი ნებისმიერი ძეგლის დემონტაჟი 15 ნოემბრამდე უნდა მოხდეს ქვეყნის ტერიტორიაზე.

11 აგვისტოს ლატვიის სეიმმა რუსეთის ძალადობა უკრაინაში მშვიდობიანი მოსახლეობის მიმართ ტერორიზმად აღიარა, ხოლო რუსეთი – ტერორიზმის მხარდამჭერ სახელმწიფოდ. ჯერ კიდევ ივნისში ლატვიაში ყველა რუსული არხის – მათ შორის, გასართობის – მაუწყებლობა აკრძალეს.

_____________

ფოტოზე: ძეგლის დემონტაჟი რიგაში. ფოტო: delfi.lv

გადაბეჭდვის წესი


ასევე: