პრეზიდენტ ჯო ბაიდანის ადმინისტრაცია უკრაინისთვის დამატებით 800 მილიონი დოლარის სამხედრო დახმარების გამოყოფას აპირებს.
როგორც სააგენტო Reuters-ი სამ კონფიდენციალურ წყაროზე დაყრდნობით წერს, გადაწყვეტილება შესაძლოა უახლოეს დღეებში გაფორმდეს.
სააგენტოს ცნობით, პრეზიდენტი ჯო ბაიდენი დახმარების გასაცემად გამოიყენებს თავის საპრეზიდენტო უფლებამოსილებას, რომელიც მას უფლებას აძლევს გასცეს ჭარბი იარაღი შეერთებული შტატების მარაგებიდან.
თეთრ სახლს ამ ინფორმაციაზე კომენტარი არ გაუკეთებია.
უკრაინული მედიის ინფორმაციით, გუშინ ესტონეთის ხელისუფლებამ უკრაინისთვის სამხედრო დახმარების კიდევ ერთი პაკეტის შესახებ გამოაცხადა. დახმარების ფარგლებში, ესტონეთი უკრაინაში ტყვიამფრქვევებსა და ტანკსაწინააღმდეგო საშუალებებს გაგზავნის.
როგორც გამოცემა Politico გუშინდელ სტატიაში აღნიშნავდა, აპრილის შემდეგ ევროპიდან სამხედრო დახმარების კლება შეინიშნება.
„ივლისის განმავლობაში ევროპის ექვს უდიდეს ქვეყანას უკრაინის მიმართ სამხედრო დახმარების ახალი ვალდებულებები არ აუღია – მსგავსი რამ თებერვლის შემდეგ პირველად მოხდა და ეს მიუთითებს, რომ ევროპის სამხედრო დახმარება შესაძლოა მნიშნელოვნად შემცირდეს ზუსტად მაშინ, როდესაც კიევი გადამწყვეტ კონტრშეტევებს იწყებს – წერს გამოცემა Politico კიელის მსოფლიო ეკონომიკის ინსტიტუტის მონაცემებზე დაყრდნობით.
