უკრაინის გენერალური პროკურატურის ინფორმაციით, 19 აგვისტოს მონაცემებით, რუსეთის უკრაინაზე თავდასხმის შედეგად დოკუმენტურად დადასტურდა და აღირიცხა ომის 29 184 დანაშაული, ასევე, უკრაინის ეროვნული უსაფრთხოების წინააღმდეგ ჩადენილი 13 593 დანაშაული.
პროკურატურის ინფორმაციით, რუსეთის უკრაინაზე თავდასხმის შედეგად დაზარალდა 1078 ბავშვი, მათ შორის დაიღუპა 362 და დაიჭრა 716 ბავშვი.
ეს რიცხვი შესაძლოა ყოველ წუთს შეიცვალოს, რადგან ყოველდღიურად დგინდება ომის მსხვერპლთა ზუსტი რიცხვი ცხელ წერტილებსა და ოკუპირებულ, გათავისუფლებულ ტერიტორიებზე.
ყველაზე მეტი, 376 ბავშვი, დონეცკის რეგიონში დაზარალდა, 202 – ხარკოვში, კიევში – 116, ჩერნიგოვში, – 68, ლუგანსკში – 61, ნიკოლაევში – 60, ხერსონში – 55, ზაპოროჟიეში კი – 40.
როგორც ცნობილია, 17 აგვისტოს ხარკოვში საცხოვრებელი კორპუსის აფეთქების შედეგად 13 წლის ბიჭი დაიღუპა, დაშავდა 12 და 13 წლის კიდევ ორი ბავშვი.
რუსეთის შეიარაღებული ძალების მიერ დაბომბვების შედეგად უკრაინაში დაზიანდა 2328 სასწავლო დაწესებულება, მათგან 289 სრულადაა განადგურებული.
