მთავარი,სიახლეები

ნინო ბაციაშვილმა ოლიმპიური მცირე ოქროს მედალი მოიპოვა

10.08.2022 • 1258
ნინო ბაციაშვილმა ოლიმპიური მცირე ოქროს მედალი მოიპოვა

ინდოეთში, ჩენაიში მიმდინარე საჭადრაკო ოლიმპიადაზე ქართველმა მოჭადრაკე ნინო ბაციაშვილმა მეორე ინდივიდუალურ დაფაზე საუკეთესო შედეგი აჩვენა და ოლიმპიურ მცირე ოქროს მედალს დაეუფლა. ეს მის კარიერაში პირველი ოლიმპიური ოქროა.

საქართველოს ჭადრაკის ფედერაცია ფეისბუქზე წერს, რომ „განსაკუთრებით აღსანიშნავია ნინოს ფენომენალური შედეგი ფინიშზე – ბოლო ოთხ ტურში – ოთხი გამარჯვება გადამწყვეტ პარტიებში“.

საქართველოს ქალთა ნაკრები 44-ე მსოფლიო საჭადრაკო ოლიმპიადის ვერცხლის პრიზიორი გახდა.

ფინიშამდე ერთი ტურით ადრე, საქართველოს ქალთა ნაკრებმა ფრედ დაასრულა შეხვედრა პოლონეთის გუნდთან. საქართველოს ჭადრაკის ფედერაციის ცნობით,  პოლონეთთან მარცხს გუნდი ნინო ბაციაშვილმა გადაარჩინა, 5-საათიანი დაძაბული ბრძოლის შემდეგ მოგებული პარტიით.

ბაციაშვილი საქართველოს ოთხგზის ჩემპიონია ჭადრაკში ქალთა შორის. იგი 2018 წლიდან საერთაშორისო დიდოსტატია მამაკაცთა შორის.  ნინო ბაციაშვილი მეხუთე ქალია საქართველოში, რომელმაც ეს წოდება მიიღო. 

გადაბეჭდვის წესი


ასევე: