ზელენსკი დასავლეთს მოუწოდებს, ჩაკეტონ საზღვრები რუსეთის მოქალაქეებისთვის

უკრაინის პრეზიდენტი, ვოლოდიმირ ზელენსკი, დასავლეთის ქვეყნებს მოუწოდებს, უკრაინაზე რუსეთის თავდასხმის პასუხად შეუზღუდონ რუსეთის მოქალაქეებს დასავლურ ქვეყნებში შესვლა.

ამის შესახებ ზელენსკიმ Washington Post-თან განაცხადა.

მან ხაზი გაუსვა, რომ მთავარი სანქცია საზღვრების დაკეტვაა, რადგან „რუსები იტაცებენ სხვის მიწას“.

„მაშინ ისინი მიხვდებიან. ისინი იტყვიან: „ამას [ომს] ჩვენთან კავშირი არა აქვს. მთელი მოსახლეობა არ შეიძლება პასუხისმგებელი იყოს, არა?!“ შეიძლება. მოსახლეობამ აირჩია ეს მთავრობა და არ ებრძვის მას, არ ეჩხუბება, არ უყვირის,“ – განაცხადა ზელენსკიმ.

მისივე თქმით, რუსეთის მიმართ არსებული სანქციები სუსტია. იგი მიიჩნევს, რომ უფრო ძლიერი შეზღუდვა იქნებოდა საზღვრების დაკეტვა რუსეთის მოქალაქეებისთვის ერთი წლით და რუსულ ენერგომატარებლების შეძენაზე სრული ემბარგო.

მისი თქმით, რუსებმა უნდა „იცხოვრონ საკუთარ სამყაროში, სანამ არ შეცვლიან თავიანთ ფილოსოფიას“.