ნეტგაზეთი • RU

უკრაინული მარცვლეულით დატვირთული პირველი გემი სტამბოლში ჩავიდა

თურქეთის თავდაცვის სამინისტროს ცნობით, უკრაინული მარცვლეულით დატვირთული პირველი გემი, რომელმაც ოდესის პორტი პირველ აგვისტოს დატოვა, უკვე სტამბოლში, ბოსფორის სრუტეშია.

RAZONI, სიერა ლეონეს დროშით მცურავი გემი, ლიბანში, ტრიპოლის პორტისკენ გაემართება სტამბოლიდან. ბორტზე 26 000 ტონა უკრაინული სიმინდია.

რუსეთის უკრაინაზე თავდასხმის შემდეგ ეს არის პირველი გემი, რომელმაც უკრაინის ტერიტორიული წყლებიდან გაიტანა მარცვლეული, ე.წ. „მარცვლეულის დერეფნის“ გავლით.

ოდესის პორტში მარცვლეულით დატვირთული კიდევ 16 გემი ელოდება ქვეყნიდან გასვლას.

უკრაინიდან მარცვლეულის გატანის ხელშეკრულებას ივნისში მოაწერეს ხელი. უკრაინიდან მიმავალი გემების მოძრაობას მონიტორინგს და მთელ პროცესს კოორდინაციას გაუწევენ გაერო და შეთანხმების მონაწილე მხარეები – უკრაინა, რუსეთი და თურქეთი.

რუსეთის უკრაინაზე თავდასხმის შემდეგ უკრაინიდან შეჩერებულია მარცვლეულის ექსპორტი საომარი მოქმედებების გამო, რაც არაერთ ქვეყანაში მარცვლეულის სერიოზულ კრიზისს ქმნის. ომის დაწყებიდან დღემდე კიევში არაერთხელ განაცხადეს, რომ რუსეთი იპარავს უკრაინულ მარცვლეულს და სევასტოპოლის პორტიდან გადააქვს.

ამავე თემაზე: 

რუსეთს უკრაინიდან არა მხოლოდ მარცვლეული, არამედ მზესუმზირაც გააქვს – BBC

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.