საკაბელო ტელევიზია „TV ERA“-მ ციფრულ მაუწყებლობაზე გადასვლა დაიწყო. ოპერატორ ნანა გრიგოლიანის განმარტებით, აბონენტებს ციფრულ მაუწყებლობაზე გადასვლასთან დაკავშირებით, რესივერის შეძენა მოუწევთ. წინააღმდეგ შემთხვევაში, სატელევიზიო პროგრამებს ვერ მიიღებენ.
„რესივერი უნდა შეიძინონ თავისი პულტით. ეს იმ ტელევიზორებს სჭირდებათ, რომლებსაც არ შეუძლიათ ციფრული სიგნალის მიღება. რესივერი თავისი პულტით ას ლარზე მეტი ღირს, თუმცა ჩვენს აბონენეტებს განახევრებულ ფასს ვახდევინებთ და სააბონენტოს ჩათვლით 60 ლარის გადახდა მოუწევთ“.
ოპერატორის განმარტებით, თუ მომხმარებელს სახლში რამდენიმე ტელევიზორი აქვს, ყოველ მეორე ტელევიზორზე რესივერის ფასი ნახევრდება.
„სააბონენტოს შემთხვევაშიც, თუ მომხმარებელს სახლში ერთზე მეტი ტელევიზორი აქვს, სააბონენტო 12 ლარს, დაემატება 6 ლარი ყოველ ტელევიზორზე“.
ახალ ტარიფებთან და მომსახურებასთან დაკავშირებით პრეტენზიები აქვთ აბონენტებს. მოქალაქე ნადიმ ბოლქვაძის თქმით, საკაბელო ტელევიზია მომხმარებელს დამატებით ფასს არ უნდა ახდევინებდეს და რესივერის ფასი სააბონენტო გადასახადში უნდა შედიოდეს.
„წყლის მრიცხველი დაამონტაჟა კომპანიამ, დენის მრიცხველსაც კომპანია ამონტაჟებს და რესივერიც საკაბელოს უნდა დაემონტაჟებინა. გარდა ამისა, გაძვირებულია ტარიფები, ყველა ტელევოზორზე 6 ლარი ემატება“.
საქართველოს პარლამენტის გადაწყვეტილებით, ციფრულ მაუწყებლობაზე გადასვლა 2015 წლის 17 ივნისიდან დაიწყო.
