ნეტგაზეთი • RU
ruseti

უკრაინაში ათასობით რუსი ლეიტენანტი და კაპიტანი დაიღუპა – პენტაგონის მაღალჩინოსანი

უკრაინაში ყოველდღიურად ასობით რუსი სამხედრო იღუპება, რუსეთის არმიის დანაკარგი უკვე ათასობით ლეიტენანტი და კაპიტანია – წერს სააგენტო Reuters-ი აშშ-ის თავდაცვის მაღალჩინოსანზე დაყრდნობით.

5 თვის შემდეგ, რაც ვლადიმერ პუტინი მეზობელ უკრაინაში შეიჭრა, რუსეთის არმიას ქვეყნის დაახლოებით მეხუთედი აქვს ოკუპირებული და დონბასის სრულად დაპყრობას ცდილობს.

აშშ-ის სადაზვერვო სააგენტოს (CIA) დირექტორმა, უილიამ ბერნსმა ოთხშაბათს განცხადება, რომ ვაშინგტონის გათვლებით, უკრაინაში დაახლოებით 15 000 სამხედრო დაიღუპა და 45 000 დაიჭრა.

მაღალჩინოსანი, რომელიც სააგენტო Reuters-ისთვის ინფორმაციის მიწოდებას კონფიდენციალურობის პირობით დათანხმდა, ამბობს, რომ ლეიტენანტებისა და კაპიტნების გარდა, რუსეთმა უკრაინაში ბევრი პოლკოვნიკი და გენერალიც დაკარგა.

რუსეთი უკრაინასთან ომში დანაკარგებს სახელმწიფო საიდუმლოებად აცხადებს. ოფიციალური ინფორმაცია, დაღუპული, დაჭრილი თუ დაკარგული სამხედროებისა და განადგურებული ტექნიკის შესახებ, რუსეთის თავდაცვას 25 მარტის შემდეგ არ გამოუქვეყნებია. 25 მარტს, უწყება აცხადებდა, რომ ომში 1 351 სამხედრო დაიღუპა.

რუსეთის დანაკარგების შესახებ ინფორმაციას ყოველდღიურად აახლებს უკრაინის გენშტაბი. ბოლო ცნობებით, რუსეთის დანაკარგი 39 000 სამხედროა.

ინფორმაციას, რამდენი უკრაინელი სამხედრო დაიღუპა რუსეთთან ომში, არც უკრაინის ხელისუფლება აქვეყნებს. ოფიციალურმა კიევმა რამდენჯერმე მხოლოდ დღეში დაღუპულ და დაჭრილ ჯარისკაცთა საშუალო რაოდენობა გაამხილა.

ივნისში, უკრაინის ხელისუფლებამ განაცხადა, რომ დონბასის ბრძოლებში, დღეში დაახლოებით 100 უკრაინელი სამხედრო კვდება, 500-მდე კი იჭრება.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.