“ბაბილონ თაუერის” მშენებლობა ისევ შეჩერებულია. პროექტთან დაკავშირებულ კითხვებზე აჭარის მთავრობას პასუხები არ აქვს, თუმცა ვალდებულებების შეუსრულებლობას კომპანიას კვლავ პატიობს. კომპანია პირგასამტეხლოს გადახდისგანაც კიდევ ერთხელ გაათავისუფლეს.
რა ხდება მშენებლობაზე, რომელიც ბათუმის ბულვარის შესასვლელთან კომპანია “TAM GEO“-მ წლების წინ დაიწყო და დღემდე შეჩერებულია? – აჭარის ფინანსთა და ეკონომიკის სამინისტროში აქვთ ინფორმაცია, რომ კომპანიაში წილების გადანაწილებაზე დავობენ. გავრცელდა ასევე ინფორმაცია, რომ პროექტის ყიდვას “მეტრო ატლას ჯორჯია” გეგმავს, თუმცა ეს ინფორმაცია “ბათუმელებთან” სატელეფონო საუბარში კომპანიაში არ დაადასტურეს.
“TAM GEO“-ს წარმომადგენლები ჟურნალისტებთან არ საუბრობენ. “დირექტორები საქართველოში არ არიან და არც მფლობელები, ჩვენ არ გვაქვს კომპეტენცია რაიმე ინფორმაცია გავცეთ”, – უთხრეს “ბათუმელებს” კომპანიაში.
კომპანია “TAM GEO“-ში, რომელიც 2012 წლის მარტში დაფუძნდა, წილები აქამდეც არაერთგზის გადანაწილდა. თავდაპირველად დამფუძნებელი პარტნიორები იყვნენ თურქული კომპანია „TAMTRADE DIS TICARET VE PAZARLAMA“ – 97% წილით და თურქეთის მოქალაქეები: ომერ ილქნური – 2%, ისმაილ ჰაქქი აიჰანი – 1%. დირექტორად თურქეთის მოქალაქე ირფან კოვუკი დაინიშნა.
ბოლო ცვლილებით, რომელიც 2015 წლის მაისში განხორციელდა, კომპანიის წილები ასე ნაწილდება: ომერ ილქნური – 1%, ისმაილ ჰაქქი აიჰანი – 1%, ბაირამ ალი ბაირამოღლუ – 50%, ირფან კოვუკი – 3%, მეჰმეთ მეთეჰან ბერქთაში – 45%.
კომპანია აჭარის მთავრობამ 2013 წლის დასაწყისში 589 914 ლარი, ხოლო წლის ბოლოს კიდევ 91 372 ლარი ჯარიმის გადახდისგან გაათავისუფლა. “ინვესტორმა აიღო ვალდებულება, რომ დაწყებულ პროექტს მიიყვანს ბოლომდე და დაასრულებს მშენებლობას”, – ნათქვამია წერილში, რომელიც „ბათუმელებმა“ სამინისტროსგან 2015 წლის 13 თებერვალს მიიღო. მას შემდეგ კომპანიას მშენებლობა არ გაუახლებია.
“TAM GEO“ ბათუმში 47-სართულიან კომპლექსს – “ბაბილონ თაუერს” აშენებს. მიწის ნაკვეთი რუსთაველის ქუჩაზე, #30-ში, ინვესტორს აჭარის მთავრობის ყოფილმა თავმჯდომარემ, ლევან ვარშალომიძემ, პირდაპირი მიყიდვის წესით გადასცა. ამ ნაკვეთთან ერთად ინვესტორს გადასცეს ნინოშვილის ქუჩის N23-ში მდებარე 513,3 კვ.მ სამეცნიერო კვლევითი ინსტიტუტის შენობა და მასზე დამაგრებული 982 კვ/მ არასასოფლო-სამეურნეო დანიშნულების მიწის ნაკვეთი.
