ომის პირველი დღეებიდან უკრაინის საომარ ჰიმნად არაერთი სიმღერა იქცა, მათ შორის უკრაინული დუეტის, ProBass-ისა და HARDI-ს ჰიტი „Доброго вечора, ми з України“ – „საღამო მშვიდობისა, ჩვენ უკრაინიდან ვართ“.
განსაკუთრებით პოპულარული გახდა ფრაზა, რომელსაც დღეს თითქმის ყველა უკრაინელი იყენებს. ხშირად ამ ფრაზით ესალმებიან საზოგადოებას პოლიტიკოსებიც – მაგალითად, თავდაცვის მინისტრი ოლექსი რეზნიკოვი და ნიკოლაევის ოლქის გუბერნატორი ვიტალი კიმი.
„დილა მშვიდობისა, ჩვენ უკრაინიდან ვართ“, ან „საღამო მშვიდობისა, ჩვენ უკრაინიდან ვართ“ სწორედ ასე იწყებს თავის ვიდეომიმართვებს ვიტალი კიმი.
როგორ გაჩნდა “საღამო მშვიდობისა, ჩვენ უკრაინიდან ვართ” უკრაინული დუეტის ჰიტში, რომელიც ომის სიმბოლოდ იქცა – DJ ProBass-ი სააგენტო „უნიანთან“ ინტერვიუში ჰყვება, რომ ფრაზას კლიპში ჯგუფ „დახაბრახას“ სოლისტი მარკო გალანევიჩი ამბობს.
„როდესაც ტრეკზე ვმუშაობდით, ძალიან ბევრი მასალა მოვისმინეთ – მათ შორის ეთნო მუსიკა, სხვადასხვა ჯგუფი, YouTube-ზეც ვეძებდით. ამ დროს ვნახეთ ფოლკ-ჯგუფის „დახაბრახას“ ინტერვიუ ერთ-ერთ უცხოურ რადიოსთან. „საღამო მშვიდობისა, ჩვენ უკრაინიდან ვართ“, – ეს იყო ერთადერთი ფრაზა, რომელიც მათ უკრაინულად თქვეს. და ისე მოგვეწონა, რომ გადავწყვიტეთ ჩაგვეწერა. სხვათა შორის, „დახაბრახამ“ მოისმინა ჩვენი სიმღერა და ძალიან მოეწონათ,“ – ჰყვება DJ ProBass-ი.
“საღამო მშვიდობისა, ჩვენ უკრაინიდან ვართ”- უკრაინული დუეტის ProBass-ისა და HARDI-ს სიმღერაა, რომელიც 2021 წლის ოქტომბერში გამოქვეყნდა და პოპულარული გახდა უკრაინაში რუსეთის შეჭრის შემდეგ. ტრეკი უკრაინულ Apple music -ის ჩარტებში 2022 წლის მარტში უკვე მერვე ადგილს იკავებდა. მას აქტიურად იყენებენ უკრაინელები ფრონტის ხაზზე გადაღებული საბრძოლო ვიდეოების ფონად.
მთავარი ფოტო: ჰიტის ავტორები/instagram.com/djprobass
