პოლონეთის ყოფილი პრეზიდენტი და ნობელის პრემიის ლაურეატი ლეხ ვალენსა მიიჩნევს, რომ თუ რუსეთში პოლიტიკური სისტემა ძირეულად არ შეიცვალა, იმპერიის განეიტრალების ერთადერთი გზა, დღევანდელი რუსეთის ნაწილებად დაშლა იქნება. 78 წლის ვალენსა დასავლეთს მოუწოდებს, არ დაკმაყოფილდეს უკრაინის გათავისუფლებით და რუსეთიც გაათავისუფლოს.
მის მოსაზრებას გამოცემა Le Figaro აქვეყნებს.
„უკრაინამ რომც მოიგოს ეს ომი, ხუთ წელიწადში ჩვენ ისევ იგივე პრობლემის წინაშე დავდგებით, ათ წელიწადში კი ვნახავთ, როგორ აღმოცენდება ახალი პუტინი“, – აფრთხილებს ვალენსა დასავლეთს და ამ სცენარის თავიდან ასაცილებლად შემდეგ გზას სთავაზობს, – „დღეს ან უნდა დავაჩქაროთ პოლიტიკური სისტემის ცვლილება, ან ხელი უნდა შევუწყოთ ხალხების ამბოხებას.
იქ 60 ერი ცხოვრობს, რომლებიც ისევე ჩაყლაპა რუსეთმა, როგორც ახლა უკრაინელებს ყლაპავს. უნდა დავეხმაროთ ამ ხალხს, აჯანყდნენ. ან პოლიტიკური სისტემა უნდა შევცვალოთ, ან რუსეთის მოსახლეობა 50 მილიონამდე უნდა ჩამოვიდეს“.
ლეხ ვალენსა საბჭოთა კავშირის პერიოდსაც იხსენებს, როდესაც, მისი თქმით, დასავლეთი ძალიან შეცდა და რუსეთის უვნებლობა დაიჯერა: „რუსეთი უნდა დანგრეულიყო, მაგრამ გორბაჩოვი საკმაოდ ჭკვიანი აღმოჩნდა. მაშინ ვამბობდით: „იყო სტალინი, ბრეჟნევი, მაგრამ გორბაჩოვი მათნაირი არაა“ და დავტოვეთ მარტო. რუსეთმა მძიმე პერიოდი გადაიარა და ახლა სურს, ისევ ისე გააგრძელოს, როგორც საუკუნეების განმავლობაში აკეთებდა – დაიპყროს ხალხები და გააფართოოს თავისი იმპერია. ეს მაშინ ჩვენი შეცდომა იყო. მე სხვაგვარად მინდოდა, მაგრამ ამის უფლება არ მომცეს“.
პოლონეთის ყოფილი პრეზიდენტი დასძენს, რომ ცხადია, დასავლეთიც ცდილობს თავისი გავლენის გაზრდას, NATO-სა და ევროკავშირის გაფართოების მეშვეობით, თუმცა „დემოკრატიული გზებით. რუსეთი კი ამას ძალადობით აკეთებს“.
მთავარი ფოტო: ლეხ ვალენსა/ფოტო: Polish Press Agency
