გამოცემა „უკრაინსკა პრავდა“ უკრაინის დაზვერვიდან კონფიდენციალურად მიღებულ ინფორმაციაზე დაყრდნობით წერს, რომ რუსები „აზოვის პოლკის“ ორი მებრძოლის სიკვდილით დასჯას აპირებენ – ნიკოლაის, საბრძოლო მეტსახელით „ფროსტი“ (მისი გვარი უცნობია) და კონსტანტინ ნიკიტენკოსი, მეტსახელით „ფოქსი“.
გამოცემის წყაროს ცნობით, ისინი კოლონიიდან გაურკვეველი მიმართულებით წაიყვანეს. „რუსი პროპაგანდისტები ურთიერთგამომრიცხავ ვერსიებს ავრცელებენ – ერთნი ამბობენ, რომ მებრძოლები ჯერ კიდევ 9 ივლისს გაასამართლეს, სხვები კი იუწყებიან, რომ სასამართლო მალე გაიმართება“, – წერს „უკრაინსკა პრავდა“.
რაც შეეხება ბრალდებას, გამოცემის ცნობით, ამაზეც სხვადასხვა ინფორმაციაა – ერთი ვერსიით, „აზოველები“ მარიუპოლში მშვიდობიან მოქალაქეებს კლავდნენ, სხვა ვერსიით კი, მებრძოლები დაჭრილი რუსი სამხედროების კოლონას დაესხნენ თავს.
მარიუპოლის უკრაინელი დამცველები, რომლებიც მაისში „აზოვსტალის“ ტერიტორიიდან გაიყვანეს, დონეცკის ოლქში იმყოფებიან. ოლენოვკის კოლონიაში, გამოცემის ცნობით, 2 500-მდე უკრაინელი სამხედროა.
29 ივნისს, ყველაზე მსხვილი გაცვლის ფარგლებში, უკრაინამ 144 სამხედრო ტყვე დაიბრუნა, მათ შორის, 95 „აზოვსტალის“ მცველია.
რუსეთის კონტროლირებად ტერიტორიაზე გადაყვანიდან დღემდე „აზოვსტალის“ დამცველების საქმეზე არც ერთი სასამართლო არ გამართულა.
9 ივნისს დონეცკის სეპარატისტული რესპუბლიკის უზენაესმა სასამართლომ სიკვდილით დასჯა მიუსაჯა სამ სამხედრო ტყვეს – 28 წლის ეიდენ ასლინს, 48 წლის შონ პინერს და 21 წლის საადუნ ბრაჰიმს. მათ ბრალად ედებათ „ძალაუფლების ხელში ჩაგდებისა და დონეცკის სახალხო რესპუბლიკის კონსტიტუციური წყობის დამხობის მცდელობა“.
მთავარი ფოტო: პოლკ „აზოვის“ მებრძოლები/ფოტო: pravda.com.ua
