ნეტგაზეთი • RU

8 წლის ბიჭი ჭადრაკის თამაშით აგროვებს ფულს უკრაინის არმიისთვის

ბიჭს ტროტუარზე პატარა მაგიდაზე ჭადრაკის დაფა გაუშლია და ოპონენტებს ელოდება. 8 წლის საველი ჟუვაკი ქუჩაში გამვლელებს ჭადრაკს ფულზე ეთამაშება – მოგებული თანხით კი უკრაინელ სამხედროებს ეხმარება.

თამაშს ფიქსირებული ფასი არ აქვს, მოთამაშეები თანხას სურვილისა და შესაძლებლობის მიხედვით იხდიან. „თუ ვინმეს არ უნდა თამაში, მაგრამ ისე უნდა, რომ ფული დატოვოს, ესეც შეუძლია“, – ამბობს საველი, რომელიც ჭადრაკს უკვე ოთხი წელია თამაშობს.

ბიჭის ბაბუა, ალექსანდ კუპჩინკისკი აღიარებს, რომ შვილიშვილს ადრე უგებდა ჭადრაკში, თუმცა ახლა ვეღარ.

ერთ საათში პატარა მოჭადრაკემ სამი პარტია ითამაშა და 340 გრივნა შეაგროვა. თანხა კი ძმასთან ერთად დახმარების პუნქტში მიიტანა.

8 წლის საველი ჭადრაკის თამაშით უკრაინის არმიას ეხმარება/ფოტო: Суспільне

ჟუვაკების ოჯახი ბუჩიდანაა. ლუცკში ისინი ომის საშინელებებს გაექცნენ. საველის დედა, ალა ჟუვაკი, სამ შვილთან ერთად, ლუცკში მშობლებთან ცხოვრობს. მეუღლე, ომის პირველივე დღიდან, კიევის ოლქის ტერიტორიული თავდაცვის ძალებში იბრძვის.

ეს პირველი შემთხვევა არ არის, როდესაც უკრაინელი ბავშვები სამხედროების დახმარებას ცდილობენ: 10 წლის ბიჭმა შეპეტოვკიდან მთელი თავისი დანაზოგი იმაში დახარჯა, რომ უკრაინელი სამხედროებისთვის მზის ენერგიაზე მომუშავე პორტატული დამტენი შეეძინა; ლვოვში მოზარდებმა მცენარეების გაყიდვა დაიწყეს, რათა უკრაინის შეიარაღებული ძალებისთვის ფული შეეგროვებინათ; 9 წლის გოგონამ ჩერნიგოვიდან თავისი გრძელი თმა ჩააბარა; 11 წლის მაქსიმმა კი ჩერნოვცის ოლქში იმდენი გამოიმუშავა, რომ უკრაინელ სამხედროებს 22 ჯავშანჟილეტი უყიდა.

მთავარი ფოტო: 8 წლის საველი ჟუვაკი/ფოტო: Суспільне

წყარო: Суспільне Новини

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.