ნეტგაზეთი • RU

16 ივლისიდან გომის მთაზე ასვლა მხოლოდ შაბათ-კვირას იქნება შესაძლებელი ოზურგეთიდან

კურორტ გომის მთაზე ასვლა, როგორც შარშან, ამ ზაფხულსაც მხოლოდ შაბათ-კვირას იქნება შესაძლებელი. საქართველოს საავტომობილო გზების დეპარტამენტის ცნობით, განსაზღვრულია ავტოტრანსპორტით გადაადგილების საათებიც. ამის მიზეზი კურორტთან მისასვლელ გზაზე მიმდინარე სარემონტო სამუშაოებია.

16 ივლისიდან ოზურგეთი-შემოქმედი-ბჟუჟჰესი-გომის მთის გზაზე ავტოტრანსპორტის მოძრაობა დასაშვები იქნება შაბათს, დღის 15:00 საათიდან ორშაბათის 09:00 საათამდე. კვირის სხვა დღეებში ყველა სახის ავტოტრანსპორტის მოძრაობა აკრძალულია.

გადაადგილება შეზღუდული იქნება 2022 წლის 31 ოქტომბრის ჩათვლით.

საავტომობილო გზების დეპარტამენტის ცნობით, ოზურგეთი-შემოქმედი-ბჟუჟჰესი-გომის მთის გზაზე დაახლოებით ერთი წელია ახალი საავტომობილო გზა კეთდება, ამისთვის 20 მილიონამდე ლარი იხარჯება. სამუშაოებს კომპანია „ნიუ როუდი“ ახორციელებს.

ამ დროისთვის ამავე გზის კმ12-კმ32 მონაკვეთზე, საავტომობილო გზების დეპარტამენტი სტიქიის შედეგად წარმოქმნილი მეწყრულ-ეროზიული პროცესების შემაკავებელ ღონისძიებებს ახორციელებს.

გომის მთაზე მოხვედრა შესაძლებელია შუახევიდანაც, თუმცა ამ გზის რეაბილიტაცია ამ ეტაპზე არ არის დაგეგმილი.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან