აშშ-ის ფინანსთა სამინისტრომ განაცხადა, რომ 100 დღეში 330 მილიარდი დოლარის ღირებულების რუსული აქტივები დაბლოკა. ინფორმაცია ამის შესახებ აშშ-ის ფინანსთა სამინისტროს ვებგვერდზე გამოქვეყნდა.
რუსული ელიტების, ნდობით აღჭურვილი პირებისა და ოლიგარქების საწინააღმდეგო საერთაშორისო ოპერატიულმა ჯგუფმა, REPO-მ გამოიყენა მრავალმხრივი კოორდინაცია, რათა დაებლოკა ან გაეყინა სანქცირებული რუსების 30 მილიარდ დოლარზე მეტი ღირებულების აქტივები, ასევე დაებლოკა ცენტრალური ბანკის აქტივები, რომელთა ღირებულებაც დაახლოებით 300 მილიარდი დოლარია.
REPO-ს წევრებმა:
- ფინანსურ ანგარიშებსა და ეკონომიკურ რესურსებში დაბლოკეს ან გაყინეს 30 მილიარდ დოლარზე მეტი ღირებულების, სანქცირებული რუსების აქტივები;
- მოხდა რუსეთის ცენტრალური ბანკის დაახლოებით 300 მილიარდი დოლარის აქტივების იმობილიზაცია;
- ჩამორთმეულია, გაყინულია ან დაპატიმრებულია იახტები და სხვა გემები, რომლებსაც ფლობენ, საკუთრებაში აქვთ ან აკონტროლებენ სანქცირებული რუსები, მათ შორის Amadea, Tango, Amore Vero, Rahil და Phi;
- ჩამორთმეული ან გაყინულია ძვირადღირებული უძრავი ქონება, რომელსაც ფლობენ, საკუთრებაში აქვთ ან აკონტროლებენ სანქცირებული რუსები;
- შეიზღუდა რუსეთის წვდომა გლობალურ ფინანსურ სისტემაზე, რაც ურთულებს რუსეთს უკრაინაში ომის შესანარჩუნებლად საჭირო ტექნოლოგიების შეძენას.
სამუშაო ჯგუფში შედიან ფინანსთა, იუსტიციის, შინაგან საქმეთა და ვაჭრობის მინისტრები ავსტრალიიდან, კანადიდან, ევროკომისიიდან, გერმანიიდან, იტალიიდან, საფრანგეთიდან, იაპონიიდან, გაერთიანებული სამეფოდან და აშშ-დან.
ეფექტური სანქციების განხორციელებისთვის REPO თანამშრომლობს კერძო სექტორთან. ფინანსური ინსტიტუტები და სხვა სუბიექტები, რომლებიც ვალდებული არიან დაიცვან როგორც სანქციები, ასევე ფულის გათეთრების წინააღმდეგ/ტერორიზმის დაფინანსების რეგულაციები, დაეხმარნენ REPO-ს სანქციებს დაქვემდებარებული აქტივების იდენტიფიცირებასა და გაყინვაში.
REPO-ს ეხმარებიან სამუშაო ჯგუფის გარეთ მყოფი ქვეყნებიც.
