ნეტგაზეთი • RU

ბათუმში სამედიცინო ცენტრის შენობა დაანგრიეს, რა შენდება აქ | ფოტო

შესწორება: მასალაში შესულია ცვლილება. ბოლო მონაცემებით, ბარათაშვილის #30-ში 4-სართულიან შენობას აშენებს შპს საოჯახო მედიცინის ცენტრი. ბრძანებას პროექტში ცვლილების შეტანის შესახებ ქალაქის მერმა, არჩილ ჩიქოვანმა 2022 წლის 25 თებერვალს მოაწერა ხელი, საბოლოო ნებართვა კი 2022 წლის 13 მაისს გაიცა. 

ბათუმში, ბარათაშვილის №30 მდებარე შენობა დაანგრიეს, ძირითადად დარჩა მხოლოდ შენობის ფასადი. ამ შენობაში წლების განმავლობაში იყო განთავსებული ჯერ ბავშვთა პოლიკლინიკა, შემდეგ კი საოჯახო სამედიცინო ცენტრი, სადაც ათასობით ბათუმელს მიუღია სამედიცინო მომსახურება.

შენობა დღეს, 22 ივნისს, ასე გამოიყურება:

ბარათაშვილის #30. ფოტო: „ბათუმელები“/ევა ართმელაძე

ბარათაშვილის #30. ფოტო: „ბათუმელები“/ევა ართმელაძე

ბარათაშვილის #30. ფოტო: „ბათუმელები“/ევა ართმელაძე

ბარათაშვილის #30. ფოტო: „ბათუმელები“/ევა ართმელაძე

ამ ადგილას ჯერ 8-სართულიანი შენობის აგება იგეგმებოდა, რომელსაც შპს „სახლი ბარათაშვილზე“ აშენებდა. ეს შპს ბათუმის საკრებულოს ყოფილი წევრის, ქართული ოცნების“ ყოფილი მაჟორიტარი დეპუტატის, მიხეილ ართმელაძის მეუღლის, მანანა ტუნაძის კომპანიაა. ის კომპანიის 50 პროცენტის მფლობელია. მანანა ტუნაძე რუსეთის მოქალაქეა.

თუმცა, 2022 წლის თებერვალში პროექტში ცვლილებები შევიდა და რენდერის თანახმად, ბარათაშვილის #30-ში, იქ, სადაც 2-სართულიანი შენობა იყო, შენდება 4-სართულიანი შენობა.

დამკვეთი შპს საოჯახო მედიცინის რეგიონული ცენტრია, რომლის 100-პროცენტიანი წილის მფლობელი, რეესტრის თანახმად, ზურაბ ვაშაყმაძეა.

ბარათაშვილის #30-ში 1972 კვმ მიწის ფართობი ამჟამად ასევე შპს საოჯახო მედიცინის რეგიონული ცენტრის საკუთრებაა.

რენდერი. გორგასალი/ბარათაშვილი 45/30.

 

პროექტის რენდერი, რაც ზონალური საბჭოს სხდომაზე იყო წარმოდგენილი 2019 წელს

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.