ნეტგაზეთი • RU

2 პირი დააკავეს ბათუმში TV პირველის ოპერატორზე თავდასხმის ფაქტზე

TV პირველის ოპერატორზე თავდასხმის ფაქტზე ორი პირი დააკავეს. ამის შესახებ სპეციალურ საგამოძიებო სამსახურში გამართულ ბრიფინგზე დღეს, 21 ივნისს, განაცხადეს.

სპეციალური საგამოძიებო სამსახურის ინფორმაციით, დაკავებულებს ბრალი წარუდგინეს  სისხლის სამართლის კოდექსის 156-ე მუხლის მეორე ნაწილის მიხედვით, რაც ითვალისწინებს ადამიანის დევნას მის პროფესიულ მოღვაწეობასთან დაკავშირებით.

„ჟურნალისტების უფლებების და მათი პროფესიული საქმიანობის დაცვა სპეციალური საგამოძიებო სამსახურის ერთ-ერთი მთავარი პრიორიტეტია,“ – აღნიშნეს სპეციალური საგამოძიებო სამსახურის ბრიფინგზე.

ბათუმში TV პირველის ოპერატორს მცირეწლოვანი შვილების თვალწინ სცემეს. შემთხვევა 19 ივნისს მოხდა. TV პირველის  გადამღები ჯგუფი ღამის ეთერში სტუმრის ჩასართავად ემზადებოდა, როცა მათთან უცხო პირები მივიდნენ და გინება დაუწყეს, მოგვიანებით კი, ფიზიკური შეურაცხყოფა მიაყენეს.

ნეტგაზეთის მასალების სხვა გამოცემებში გადაბეჭდვის წესი
ავტორი