ნეტგაზეთი • RU

ხულოს 6, ხოლო შუახევის 9 სკოლაში პირველკლასელი არ ჰყავთ

აჭარის ხუთ მუნიციპალიტეტში [ხულო, შუახევი, ქედა, ხელვაჩაური, ქობულეთი] წელს საჯარო და კერძო სკოლა ჯამში 2 382-მა მეთორმეტეკლასელმა დაამთავრა.

ხუთივე მუნიციპალიტეტის სკოლებში, რესურსცენტრების ინფორმაციით, ამ დროისთვის ჯამში 2 091 პირველკლასელია დარეგისტრირებული.

აჭარაში ახალი სასწავლო წლისთვის პირველკლასელი არ ჰყავს 15 საჯარო სკოლას. აქედან 6 სკოლა ხულოშია, 9 სკოლა კი – შუახევში. 

ხულოსა და შუახევში, ბოლო ხუთი წლის მონაცემებით, უმნიშვნელოდ მაგრამ მაინც შეინიშნება პირველკლასელთა საერთო რაოდენობის კლება. მაგალითად, ხულოს სკოლებში 2017 წელს 238 პირველკლასელი სწავლობდა, წელს კი სულ 192 მოსწავლეა დარეგისტრირებული; შუახევში 2017 წელს 133 პირველკლასელი იყო, წელს კი – 111 პირველკლასელია.

კურსდამთავრებულთა და პირველკლასელთა სტატისტიკა აჭარის მუნიციპალიტეტების სკოლებში
  • ხულოში [სადაც 49 საჯარო და 1 კერძო სკოლაა], 2022 წელს 296-მა მეთორმეტეკლასელმა დაამთავრა სკოლა, პირველ კლასში კი – 192 დარეგისტრირდა;
  • შუახევში [43 საჯარო და 1 კერძო სკოლა] – დაამთავრა 176-მა მეთორმეტეკლასელმა, პირველ კლასში დარეგისტრირდა – 111;
  • ქედაში [29 საჯარო სკოლა] – დაამთავრა 165-მა მეთორმეტეკლასელმა, პირველ კლასში დარეგისტრირდა – 163;
  • ხელვაჩაურში [35 საჯარო და 2 კერძო სკოლა] – დაამთავრა 765-მა მეთორმეტეკლასელმა, პირველ კლასში დარეგისტრირდა – 720;
  • ქობულეთში [46 საჯარო და 3 კერძო სკოლა] – დაამთავრა 980-მა მეთორმეტეკლასელმა, პირველ კლასში დარეგისტრირდა – 905.

საჯარო სკოლებში მოსწავლეთა რეგისტრაცია ჯერ არ დასრულებულა და მონაცემები შესაძლოა შეიცვალოს.

_______________

ფოტო „ბათუმელების“ არქივიდან

ნეტგაზეთის მასალების სხვა გამოცემებში გადაბეჭდვის წესი
ავტორი