შემოსავლების სამსახურმა ნინოწმინდის საბაჟო გამშვებ პუნქტზე დაახლოებით ნახევარი მილიონი ლარის ღირებულების, არადეკლარირებული სიგარეტი აღმოაჩინა. ამის შესახებ ინფორმაციას შემოსავლების სამსახური ავრცელებს.
სიგარეტი სამ ტრაილერში იყო გადანაწილებული.
„სამართალდამცველების მიერ ინფორმაციის ანალიტიკურად დამუშავების შედეგად, შეჩერებული იქნა საერთაშორისო გადაზიდვების განმახორციელებელი, უცხო ქვეყნის სანომრე ნიშნის მქონე 3 სატვირთო ავტომობილი. ავტომობილების დეტალური დათვალიერების შედეგად, მისაბმელი კონსტრუქციის იატაკში მოწყობილ სამალავში დაახლოებით ნახევარი მილიონი ლარის ღირებულების, არადეკლარირებული სიგარეტი აღმოაჩინეს,“ – ნათქვამია შემოსავლების სამსახურის მიერ გავრცელებულ რელიზში.
ოპერაცია ფინანსთა სამინისტროსა და შინაგან საქმეთა სამინისტროს თანამშრომლებმა ერთობლივად ჩაატარეს.
საქმის მასალები შემდგომი რეაგირების მიზნით, ფინანსთა სამინისტროს საგამოძიებო სამსახურს გადაეცა.
