დღეს, 31 მაისს, ბათუმის თოჯინების თეატრის სამხატვრო ხელმძღვანელი და დირექტორი თანამდებობიდან გაათავისუფლეს. როგორც თეატრის სამხატვრო ხელმძღვანელმა, გიორგი ჩხაიძემ, „ბათუმელებს“ უთხრა, გათავისუფლების შესახებ ის ჯერ სიტყვიერად გააფრთხილეს.
„ჯერ ბრძანება არ არის დაწერილი, თუმცა სიტყვიერად გაგვათავისუფლეს. ვადა ამომეწურა. ვადის ამოწურვამდე უნდა დანიშნულიყო არჩევნები, მაგრამ არ შეკრებილა არც საბჭო, არც არაფერი, თუმცა ჰყავთ სხვა კანდიდატი, ირაკლი კიკვაძე და როცა კანდიდატი არჩევნებამდე ცნობილია, უკვე არაფერს აზრი არ აქვს“, – გვითხრა გიორგი ჩხაიძემ.
თეატრის ყოფილი დირექტორი თემურ მახარაძეც ამბობს, რომ ვადა ამოეწურა, თუმცა სამინისტროს ვადის ამოწურვამდე უნდა გამოეცხადებინა კონკურსი. „რა თქმა უნდა, ვაპირებდით კონკურსში მონაწილეობას, მაგრამ 10 დღის წინ კულუარებში გავიგეთ, რომ კონკურსის გამოცხადებამდე შეარჩიეს კანდიდატი. ყველაფერი წინასწარ აქვთ გადაწყვეტილი,“- გვითხრა მახარაძემ.
„ბათუმელები“ აჭარის განათლებისა და კულტურის სამინისტროსაც ესაუბრა, სადაც გვითხრეს, რომ ბრძანების მიხედვით, სამხატვრო ხელმძღვანელი და დირექტორი 4 წლის ვადით ინიშნებიან. „ვადა ამოიწურა, ამიტომ ორივე ერთად გათავისუფლდა“, – განაცხადეს სამინისტროში.
კითხვაზე, თუ რატომ არ ჩატარდა ხელმძღვანელების გათავისუფლებამდე არჩევნები და არის თუ არა ირაკლი კიკვაძე სამინისტროს მიერ უკვე შერჩეული კანდიდატი? – სამინისტროში გვიპასუხეს, რომ კიკვაძის თაობაზე ინფორმაცია არ აქვთ.
„კონკურსი აწი უნდა გამოცხადდეს“, – გვითხრეს სამინისტროში.
___
მთავარი ფოტო: გიორგი ჩხაიძე
