„საბჭოთა კავშირი დაბრუნდა“: დამპყრობლებმა მარიუპოლში სკოლა გახსნეს“ – ამ სათაურით აქვეყნებს უკრაინული გამოცემა unian-ი მარიუპოლის 65-ე სკოლის შესახებ ინფორმაციას. გამოცემის ცნობით, დაბომბილ და დაპყრობილ ქალაქში რუსებმა სკოლა „გახსნეს“.
ინფორმაციას გამოცემა მარიუპოლის მერის მრჩევლის, პეტრო ანდრიუშჩენკოზე დაყრდნობით ავრცელებს. მან სკოლის გახსნის შესახებ ფოტოები საკუთარ ტელეგრამ არხზე გამოაქვეყნა.
პეტრო ანდრიუშჩენკო წერს, რომ მშობლები აიძულეს დაბომბილი სკოლის შენობიდან ნაგავი გაეტანათ და ფანჯრებზე ცელოფნები აეკრათ.
ფაქტობრივად 9 კლასი შეაგროვეს, თითოეულში 35-45 ბავშვით. სკოლა მუშაობს პატარა სივრცეში. ბავშვებისთვის საკვები არ არის. სკოლას ელექტროენერგია ერთი გენერატორიდან მიეწოდება. ეს არის განათლება კომპიუტერებისა და ტენოლოგიების გარეშე. სწავლება რუსულ ენაზე: ლიტერატურა და მათემატიკა, – წერს პეტრო ანდრიუშჩენკო.
მისი მონაცემებით, სკოლადამთავრებულებს რუსები ეგრეთ წოდებული დონეცკის რესპუბლიკის (DPR) დიპლომებს ჰპირდებიან, სწავლის გაგრძელებას კი იმ უმაღლეს სასწავლებლებში, რომლებიც მდებარეობს რუსეთის ეკონომიკურად დეპრესიულ რეგიონებში და თავად რუსებში არ არის მათზე მოთხოვნა.
„მარიუპოლში დაბრუნდა საბჭოთა კავშირი, შუა საუკუნეებისა და ტოტალიტარიზმის ყველა ფერით. მხოლოდ დარჩა მარიუპოლისთვის სახელის გადარქმევა ჟდანოვად“, – ამბობს მერის მრჩეველი.
რუსებმა დაბომბილი სკოლა „გახსნეს“.
______________________
მთავარი ფოტო: პეტრო ანდრიუშჩენკო/მარიუპოლის დაბომბილი სკოლა
