ნეტგაზეთი • RU

ხულოში კაცს სავარაუდოდ დათვი დაესხა – მისი მდგომარეობა მძიმეა

ხულოში, სოფელ რაქვთაში შუახნის კაცი შესაძლოა დათვის თავდასხმის შედეგად დაშავდა. ის უგონო მდგომარეობაში იპოვეს ახლობლებმა ტყეში. დაშავებული კაცი ბათუმში კლინიკა „მედალფაში“ გადმოიყვანეს.

როგორც მერის წარმომადგენელი სოფელში ზვიად აბაშიძე გვეუბნება, შუახნის კაცი ტყეში მარტო იყო გასული საქონლის მოსაყვანად. „როცა აღარ დაბრუნდა, მოძებნეს და იპოვეს გონდაკარგული“-გვეუბნება ის.

„ბათუმელები“ კლინიკასაც დაუკავშირდა. როგორც კლინიკაში გვეუბნებიან, დაშავებული კაცის მდგომარეობა მძიმეა, თუმცა დაზიანებები შესაძლოა არ უკავშირდებოდეს დათვის თავდასხმას.

„პაციენტი აპარატზეა შეერთებული, აქვს თავის, სახის ძვლების და ქალა ტვინის მძიმე ტრავმა, ჰემორაგიებით თავის ტვინში. მდგომარეობა ძალიან მძიმეა.

თუმცა შესაძლოა ეს დაზიანებები კაცს მიეღო დაცემისგან და არა დათვის თავდასხმისგან, რადგან ბრჭყალების ნაკვალევი არ აღენიშნება. როგორც გვითხრეს, ახლო-მახლო დათვი იყო, მაგრამ დაზიანებები დათვის დატორილს არ ჰყავს, შესაძლოა გარბოდა და მაშინ დაეცა კაცი“-გვეუბნებიან კლინიკაში.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com