დიდი ბრიტანეთის დაზვერვა, 27 მაისის პოსტში, უკრაინის აღმოსავლეთ და სამხრეთ რეგიონებში არსებულ ვითარებას მიმოიხილავს.
უწყების ინფორმაციით, მას შემდეგ, რაც პოპასნაიას ჩრდილო-აღმოსავლეთისკენ რამდენიმე სოფელი აიღეს, რუსეთის სახმელეთო ჯარები ცდილობენ ალყაში მოაქციონ სევეროდონეცკი და ლისიჩანსკი, თუმცა უკრაინული ძალები ინარჩუნებენ კონტროლს რამდენიმე სექტორზე და რუსეთს მთელი დონბასის დაკავების საშუალებას არ აძლევენ.
ბრიტანეთის დაზვერვის ცნობით, რუსეთის შეიარაღებული ძალების დანაყოფები კვლავაც ეცდებიან უკრაინის სამხრეთ ტერიტორიების ოკუპაციას.
„ბოლო დღეებში რუსეთმა, დიდი ხნით შენახული 50-წლიანი ტანკები, T-62-ები, უკრაინის სამხრეთით გადაიყვანა. T-62 დიდი ალბათობით ძალიან დაუცველი აღმოჩნდება ტანკსაწინააღმდეგო საშუალებების წინაშე. ბრძოლის ველზე მათი გამოჩენა, რუსეთისთვის თანამედროვე, ბრძოლისუნარიანი, ტექნიკის ნაკლებობაზე მიანიშნებს“, – წერს ბრიტანეთის დაზვერვა.
26 მაისის განახლებაში დიდი ბრიტანეთის თავდაცვა რუსეთის საჰაერო-სადესანტო ძალებზე წერდა და აღნიშნავდა, რომ რუსეთი არასწორად იყენებს ამ სამხედრო პოტენციალს, რამაც ის სერიოზულ დანაკარგებამდე მიიყვანა.
მთავარი ფოტო: რუსული T-62 რუსეთის სამხედრო ისტორიის მუზეუმში/Wikipedia