ნეტგაზეთი • RU

აზოვსტალის მეპატრონე: რუსეთს ყველა ინსტანციაში ვუჩივლებთ მოყენებული ზარალისთვის

რინატ ახმეტოვი, მარიუპოლში მდებარე „აზოვსტალის“ ქარხნის მეპატრონე, აპირებს რუსეთს უჩივლოს მისი ბიზნესისთვის მიყენებული ზიანისა და ზარალის გამო. ამის შესახებ მან უკრაინულ მედიაგამოცემა НВ-სთან ექსკლუზიურ ინტერვიუში განაცხადა.

ახმეტოვი, რომელიც უკრაინის უმდიდრესი ადამიანი, System Capital Management-ის დამფუძნებელია, სწორედ ამ კომპანიაში შედის მეტალურგიული ქარხანა „აზოვსტალი“.

„რუსეთის ფედერაციის ფართომასშტაბიანი შეტევის დაწყების შემდეგ აზოვსტალი, ილიჩის სახელობის მარიუპოლის მეტალურგიული კომბინატი, ავდიივკას ქიმიური ქარხანა, ლუგანსკის თბოელექტროსადგური და ათობით სხვა სამრეწველო ინფრასტრუქტურა და მწვანე ენერგეტიკული ობიექტი ნაწილობრივ ან მთლიანად განადგურდა ან იძულებით გამოვიდა ექსპლუატაციიდან. ამ ობიექტების კაპიტალიზაცია ომის დაწყებამდე ათობით მილიარდ დოლარს შეადგენდა.

ჩვენ აუცილებლად ვუჩივლებთ რუსეთის ფედერაციას და მოვითხოვთ სათანადო ანაზღაურებას ყველა ზარალისა და დაკარგული ბიზნესისთვის. ამ საკითხებზე სამართლებრივი მუშაობა უკვე აქტიურად მიმდინარეობს.

ჩვენ სარჩელით მივმართავთ ყველა საერთაშორისო და ეროვნულ ინსტანციას,“ – განაცხადა ახმეტოვმა.

მისივე თქმით, აზოვსტალისა და ილიჩის ქარხნებზე რუსეთის აგრესიის გამო მიყენებული ზარალი დაახლოებით 17-20 მილიარდი დოლარია.

ინტერვიუში ახმეტოვი ამბობს, რომ ომის დაწყებიდან დღემდე უკრაინაშია და ქვეყნის დატოვებას არ აპირებს.

„23 თებერვალს, საღამოს, პრეზიდენტთან [ზელენსკისთან] შეხვედრის შემდეგ მეგობრებთან ვივახშმე სახლში, კიევში. უმრავლესობა, ისევე როგორც მე, დარწმუნებული ვიყავით, რომ ომი დაიწყებოდა. მე მათ მკითხეს იგივე: რატომ არ წავედი. თქვენ გიპასუხებთ იმავეს, რაც მათ ვუთხარი: ომს მე შევხვდები ჩემს სახლში, უკრაინაში, თქვენ მსგავსად. ჩამოფრენა და მალევე გაფრენა მიუღებელია ჩემთვის, ადამიანურად ძალიან სირცხვილია,“ – თქვა ახმეტოვმა.

______________

ფოტო: EPA/ROBERT GHEMENT

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com