უკრაინული მედიის ცნობით, კიევის მაღაზიებში მარილის დეფიციტია, პროდუქტზე ფასი კი მკვეთრად გაიზარდა – მიზეზი საწარმო „არტემსოლის“ გაჩერებაა.
„არტემსოლი“ მარილის მომპოვებელი და გადამამუშავებელი უმსხვილესი საწარმოა ევროპაში, რომელიც ბახმუტთან ახლოს, ქალაქ სოლედარში, დონეცკის ოლქში მდებარეობს. სწორედ ამ ტერიტორიებზე მიმდინარეობს ახლა მთავარი ბრძოლები.
„საწარმო გაჩერებულია, ბრძანების თანახმად, გაურკვეველი დროით. სროლა გამუდმებით გრძელდება, ნაწილობრივ დანგრეულია ადმინისტრაციის შენობა. იყო საწყობებზე პირდაპირი თავდასხმებიც. საწარმოო პროცესის გაგრძელება შეუძლებელია. ხალხს ასეთ საფრთხეში ვერ ჩავაგდებთ. თანაც, სოლედარის მცხოვრებლები, ისინიც, ვინც „არტემსოლში“ მუშაობენ, უკვე ევაკუირებულნი არიან. თანამშრომლებისა და ადმინისტრაციის დიდი ნაწილი აქ აღარაა“, – განაცხადა დირექტორის მოვალეობის შემსრულებელმა ვიქტორ იურინმა.
იურინის ინფორმაციით, საწარმო ჯერ კიდევ აპრილში გაჩერდა, რადგან ამ დროს უკვე შეუძლებელი იყო ქალაქიდან პროდუქციის რკინიგზით გატანა.
„მარილი რომ მაღაზიებში გაიყიდოს, ის უნდა დაამზადოს ვინმემ. ვიდრე ბრძოლები გრძელდება, მოგვიწევს ჩვენი მარილის იმპორტირებულით ჩანაცვლება“, – ამბობს იურინი.
მისი თქმით, „არტემსოლის“ გაჩერებას უკრაინის გარდა სხვა ქვეყნებშიც მალე იგრძნობენ, მათ შორის, უნგრეთში, პოლონეთში, საქართველოში, მოლდოვაში, აზერბაიჯანსა და რუმინეთში.
საქართველოს ფინანსთა სამინისტროსა და შემოსავლების სამსახურის ოფიციალური მონაცემებით, 2022 წლის იანვარ-თებერვალში უკრაინიდან 1 256 ტონა მარილი შემოვიდა. თურქეთისა და ირანის შემდეგ უკრაინა საქართველოსთვის მარილის ყველაზე მსხვილი იმპორტიორია.
მთავარი ფოტო: „არტემსოლის“ მარილი კიევის ერთ-ერთ მაღაზიაში/Типичный Киев
