ნეტგაზეთი • RU

რუსეთი მოსკოველებსა და პეტერბურგელებს ფრონტის წინა ხაზზე არ გზავნის

ოფიციალური სტატისტიკის ანალიზი აჩვენებს, რომ რუსეთის სამხედრო სარდლობა ცდილობს არ გაგზავნოს მოსკოვისა და პეტერბურგის მცხოვრებლები ფრონტის წინა ხაზზე – განაცხადა უკრაინის შინაგან საქმეთა მინისტრის მრჩეველმა, ვადიმ დენისენკომ უკრაინულ ტელეარხზე. ინფორმაციას სააგენტო „უნიანი“ ავრცელებს.

„რუსული ოფიციალური სტატისტიკის თანახმად, დანაკარგების რაოდენობით პირველ ადგილზეა ბურიატია, 100 000 მოსახლეზე 99 ადამიანი. შემდეგ მოდის დაღესტანი და რიგი სხვა რეგიონები”, – განაცხადა დენისენკომ.

შს მინისტრის მრჩევლის თქმით, რუსეთში ყველაზე მცირე დანაკარგი არის იამალო-ნენეცკის რეგიონში, მაგრამ აქ მცხოვრებთა უმეტესობა არ არის გაწვეული და ისედაც, რეგიონში მოსახლეობის რაოდენობა მცირეა. მეორე და მესამე ადგილზე, ყველაზე მცირე ზარალით კი მოსკოვი და პეტერბურგია.

„ოფიციალურად აღიარებული გარდაცვალების რაოდენობა მოსკოვში 420-ჯერ ნაკლებია, ვიდრე ბურიატიაში ანუ რუსეთის დედაქალაქში ზარალი ფაქტობრივად 2-3 ადამიანია 15 მილიონზე. პეტერბურგშიც დაახლოებით იგივეა“, – განაცხადა დენისენკომ.

შინაგან საქმეთა მინისტრის მრჩეველმა განმარტა, მისი აზრით, რატომ ცდილობენ რუსი სამხედრო მეთაურები მოსკოვისა და პეტერბურგის მცხოვრებლები არ გაგზავნონ უკრაინის ფრონტის ხაზზე.

„პირველ რიგში, რუსი მეთაურები ცდილობენ, რომ ამ ქალაქების მცხოვრებლები ფრონტზე არ მოხვდნენ ე.წ. ნულოვან ხაზზე. მეორეც, თუ წვევამდელები მოსკოვიდან და პეტერბურგიდან დაიღუპებიან ან დაიკარგებიან უკრაინის ტერიტორიაზე, ოფიციალური დაკრძალვები და სამგლოვიარო ისტორიები მოსკოვში არ იყოს“, – აღნიშნა დენისენკომ.

იგი მიიჩნევს, რომ პუტინსა და მის გარემოცვას ესმის, რომ ყველა რევოლუცია, რაც ისტორიაში იყო, დედაქალაქებიდან დაიწყო.

„ისინი ინარჩუნებენ სიმშვიდეს და უსაფრთხოების განცდას მოსკოვსა და პეტერბურგში, რათა არავითარ შემთხვევაში არ დაიწყოს დაუმორჩილებლობის გამოვლინება. რადგან სწორედ ამ ქალაქებიდან შეიძლება დაიწყოს გარკვეული რევოლუციური მოძრაობები რუსეთში“, – განაცხადა დენისენკომ.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com