მთავარი,სიახლეები

„მობილურზეც ვეღარ ვრეკავთ“ – 55 ოჯახი სოფელში ერთი თვეა სატელეფონო კავშირის გარეშეა

10.05.2022 • 1647
„მობილურზეც ვეღარ ვრეკავთ“ – 55 ოჯახი სოფელში ერთი თვეა სატელეფონო კავშირის გარეშეა

„ტყეში უნდა წახვიდე საგანგებოდ და მოძებნო შემაღლებული ადგილი, შესაძლოა, იარო ბევრი და მაინც ვერ დაიჭირო ან დაიწყო ლაპარაკი და შუა გზაში შეწყდეს, სახლიდან ვერ დარეკავ ვერსად, გამორიცხულია,“ – ამბობს იური თავდგირიძე, რომელიც შუახევში, სოფელ ნაღვარევში ცხოვრობს.

ნაღვარევში გვითხრეს, რომ ტელეფონით დაკავშირება იდეალური არც წინა თვეებში იყო, მაგრამ დაახლოებით თვე-ნახევრის წინ სახლიდან ტელეფონზე დარეკვა შეუძლებელი გახდა. ორი კვირის წინ კი, სოფელში გაიგეს, რომ მეზობელ სოფელ ინწკირვეთში სატელეკომუნიკაციო ანძა დაზიანდა და თითქოს უკვე შეაკეთეს.

„ერთი თვე ტყეშიც არ იჭერდა, ახლა, ბოლო ორი კვირა ტყეში იჭერს და ესაა… ვერავინ გვეუბნება, თუ ანძა აღდგა, პრობლემა რაშია,“ – უთხრა „ბათუმელებს“ იური თავდგირიძემ.

„ინტერნეტზე აღარაა ლაპარაკი, არც კი ვოცნებობთ,“ – დასძინა იური თავდგირიძემ.

იმას, რაც ნაღვარევში გვითხრეს, დაადასტურეს შუახევის მერიაშიც. მერიის პრესცენტრში განმარტეს, რომ ანძა დაზიანებულია და მის შეკეთებას უახლოეს დღეებში დაიწყებს კომპანია „ჯეოსელი“.

თუმცა კომპანია „სილქნეტში“, რომელიც „ჯეოსელის“ წილებს ფლობს, ირწმუნებიან, რომ პრობლემა ნაღვარევში უკვე მოგვარებულია.

„შემოწმდა ტექნიკური ანძა, სიგნალი, ხარვეზი არ აქვს, აპრილში რამდენიმე დღე დენი არ მიეწოდებოდა ანძას, აღადგინეს, სამუშაოები აწარმოეს, დაამატეს სიგნალის გასაძლიერებელი ანტენა,“ – მოგვწერეს კომპანია „სილქნეტის“ პრესცენტრიდან.

შუახევის მერიის ინფორმაციით, სოფელ ნაღვარევში ზამთრობით 35 ოჯახი ცხოვრობს, ხოლო ზაფხულობით – 55 ოჯახი.

გადაბეჭდვის წესი


ასევე: