ნეტგაზეთი • RU

ФСБ აცხადებს, რომ დააკავა „უკრაინული ნაციზმის“ მომხრეები, რომლებიც დივერსიას გეგმავდნენ

რუსეთში, ბელგოროდის ოლქში, ФСБ-მ „დივერსია აღკვეთა“ და რუსეთის 2 მოქალაქე დააკავა – ინფორმაციას რუსული მედია, TASS-ი ავრცელებს.

გამოცემის ცნობით, დაკავებულები უკრაინელი ნაციონალისტების მხარდამჭერები არიან, რომლებმაც რუსი სამხედროების შესახებ მონაცემები უკრაინულ ვებგვერდ Миротворец-ზე გაგზავნეს.

რუსეთის უშიშროების სამსახური აცხადებს, რომ დაკავებულები „უკრაინული ნაციზმის“ მომხრეები არიან და ბელგოროდში დივერსიას ამზადებდნენ.

„აღნიშნულმა პირებმა უკრაინულ ვებსაიტ Миротворец-ზე გაგზავნეს ინფორმაცია რუსეთის ფედერაციის შეიარაღებული ძალების სამხედროების შესახებ, რომლებიც მონაწილეობდნენ სპეცოპერაციაში.  ეჭვმიტანილები გეგმავდნენ რკინიგზის ლიანდაგის დაზიანებას, რომლითაც სამხედრო ეშელონები მოძრაობენ“, – აცხადებს ФСБ.

„ტასის“ ცნობით, დაკავებულებს 10-დან 15 წლამდე პატიმრობა ემუქრებათ.

26 აპრილს, გვიან ღამით, რუსეთში, უკრაინის საზღვართან ახლოს მდებარე ბელგოროდის ოლქში სამხედრო საწყობი დაიწვა. რუსული მხარე ჯერჯერობით მიზეზს არ ასახელებს.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com