ნეტგაზეთი • RU

ბავშვების, ქალებისა და ხანდაზმულებისთვის შესაძლოა ჰუმანიტარული დერეფანი გაიხსნას – ვერეშუკი

უკრაინის ვიცე-პრემიერის, ირინა ვერეშუკის განცხადებით, მიღწეული შეთანხმებით, დღეს, 2022 წლის 20 აპრილს,  14:00 საათიდან ჰუმანიტარული დერეფანი უნდა გაიხსნას მარიუპოლიდან ბავშვების, ქალებისა და ხანდაზმულების ევაკუაციისთვის.

„მარიუპოლში არსებული კატასტროფული ჰუმანიტარული ვითარებიდან გამომდინარე, მთელ ჩვენს ძალებს სწორედ ამისკენ მივმართავთ.

მოვახერხეთ წინასწარი შეთანხმება ჰუმანიტარულ დერეფანზე ქალების, ბავშვებისა და მოხუცებისთვის.

შეკრება მარიუპოლში დღეს, 20 აპრილს, 14:00 საათიდან, ტაგანროგისა და ტაგანროგის 130-ე დივიზიის ქუჩების კვეთაზე.

კოლონა იმოძრავებს შემდეგი მიმართულებით: მარიუპოლი-მანგუში-ბერდიანსკი-ტოკმაკი-ორიხოვი-ზაპოროჟიე.

იმის გათვალისწინებით, რომ უსაფრთხოების თვალსაზრისით ვითარება ძალიან რთულია, დერეფნის უზრუნველყოფის დროს შეიძლება მოხდეს ცვლილებები, ამიტომ გთხოვთ, თვალი ადევნოთ შესაბამის ოფიციალურ შეტყობინებებს.

ჩვენ ყველა ძალას ვიხმართ, რომ ყველაფერმა ისე ჩაიაროს, როგორც საჭიროა“, – წერს ვიცე-პრემიერი საკუთარ ფეისბუქგვერდზე.

დღეს 36-ე საზღვაო ქვეითი ბრიგადის მეთაურმა, სერგეი ვოლინამ თავის ვიდეომიმართვაში მსოფლიო ლიდერებს მარიუპოლში, „აზოვსტალის“ ტერიტორიაზე მყოფი სამხედროებისა და მშვიდობიანი მოქალაქეების გადარჩენა სთხოვა.  

___

მთავარი ფოტო: „აზოვსტალის“ ტერიტორიას აზოვის პოლკის ჯარისკაცებთან ერთად თავს აფარებენ ქალები და ბავშვები, სამოქალაქო პირები. ასევე არიან დაჭრილებიც.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.