ბათუმის საკრებულოს წევრი „ლელოდან“, ირაკლი კუპრაძე მოსამართლე ხათუნა ბოლქვაძემ გაამართლა. ის 2 მარტს ბათუმში, სოლიდარობის აქციაზე პოლიციელებმა ადმინისტრაციული წესით დააკავეს და სამართალდარღვევის ოქმში ჩაწერეს, რომ მან პოლიციელებს „მონა“ უწოდა.
ეს უკვე მეორე შემთხვევაა, როცა მოსამართლე ხათუნა ბოლქვაძემ „მონას“ დაძახება სამართალდარღვევად არ მიიჩნია – 4 აპრილს ხათუნა ბოლქვაძემ გაამართლა თბილისის საკრებულოს წევრი „გირჩიდან“ ცოტნე კობერიძე, რომელმაც ბათუმში ირაკლი ღარიბაშვილს საჯაროდ დაუძახა: „ბიძინას მონა“.
ირაკლი კუპრაძე კი ამბობდა, რომ შეურაცხყოფა აქციაზე არავისთვის მიუყენებია და არც წინააღმდეგობა გაუწევია პოლიციელებისთვის. ის დაახლოებით 40 საათი გააჩერეს წინასწარი დაკავების იზოლატორში.
