ნეტგაზეთი • RU

შუახევში მეწყერი ჩამოწვა

შუახევში, ცენტრალურ და კობალთა-შუახევის გზებზე მეწყერი ჩამოწვა – ინფორმაცია „ბათუმელებს“ დაუდასტურა ვახტანგ ბერიძემ, შუახევის მერის წარმომადგენელმა შუბნის ადმინისტრაციულ ერთეულში.

„მოსახლეობას საფრთხე არ ემუქრება. უკვე დასრულებულია შუბანი- შუახევის ცენტრალური გზის გაწმენდა და ახლა კობალთა-შუბნის ცენტრალური გზის გაწმენდას დავიწყებთ“, – ამბობს ვახტანგ ბერიძე.

მისი ინფორმაციით, შეფერხებული მოძრაობა კობალთა-შუბანის დამაკავშირებელ გზაზე დღის ბოლომდე სრულად აღდგება.

კობალთა-შუბანის დამაკავშირებელი ცენტრალური გზა. ფოტო: მიშა შაინიძე

სოფელ კობალთის მკვიდრის, 18 წლის მიშა შაინიძის თქმით, მეწყრული მასა აქ ყოველ გაწვიმებაზე ჩამოდის.

„ამ გზაზე ყოველდღე დადიან მოსწავლეები. დილით, სკოლაში რომ წავედით, მეწყერი არ იყო. სკოლაში შეგვატყობინეს, რომ მეწყერი ჩამოწვა. აქ მეწყერი ყოველ გაწვიმებასა და თოვლის დნობისას  აქტიურდება“, – ამბობს მიშა

მისი თქმით, დღეს, 15:00 საათზე, იმ ზონაში, სადაც მეწყერი ჩამოწვა, ადგილზე არავინ იმყოფებოდა და არც ტექნიკა მუშაობდა.

კობალთა-შუბანის დამაკავშირებელი ცენტრალური გზა. ფოტო: მიშა შაინიძე

„ბათუმელები“ შუახევის მუნიციპალიტეტის მერიას დაუკავშირდა. პრესსამსახურში გვითხრეს,რომ სოფელ კობალთაში მცირე მეწყერია განვითარებული.

„მერის მოადგილემ და საკრებულოს წევრებმა ისარგებლეს დღეს ამ გზით და შემდეგ ჩამოწვა მეწყერი. ყველა საქმის კურსშია, ტექნიკა მიდის უკვე და უახლოეს მომავალში გაიწმინდება გზა.

მეწყრის ჩამოწოლა გასაკვირი არ არის, რადგან გაზაფხულზე და შემოდგომაზე ხშირია ასეთი შემთხვევები“, – გვითხრეს პრესსამსახურში.

კობალთა-შუბანის დამაკავშირებელი ცენტრალური გზა. ფოტო: მიშა შაინიძე

ნეტგაზეთის მასალების სხვა გამოცემებში გადაბეჭდვის წესი
ავტორი