გერმანიაში შესაძლოა სისხლის სამართლის პასუხისმგებლობა დაეკისროთ იმ პირებს, რომლებიც გამოსახავენ ასო Z-ს უკრაინაში რუსეთის ომის მხარდაჭერის სიმბოლოდ.
გერმანიის შინაგან საქმეთა სამინისტროს პრესსპიკერმა 28 მარტს განაცხადა, რომ „ასო Z, ცხადია, არ იკრძალება, მაგრამ მისი გამოყენება ცალკეულ შემთხვევებში შეიძლება იყოს რუსეთის ომის მოწონება“.
გერმანიაში, საქსონიისა და ბავარიის ფედერალურ მიწებზე, უკვე დაწესდა სანქციები საზოგადოებრივ ადგილებში Z ნიშნის გამოყენებისთვის.
„ყველა, ვინც საჯაროდ გამოხატავს რუსეთის პრეზიდენტის უკრაინის წინააღმდეგ დაწყებული ომის მხარდაჭერას Z-ის საშუალებით, უნდა ელოდეს სისხლის სამართლებრივ დევნას ქვემო საქსონიაში“, – განაცხადა ქვემო საქსონიის შინაგან საქმეთა მინისტრმა 25 მარტს.
„დოიჩე ველეს“ ცნობით, გერმანიის მთავრობამ დადებითად შეაფასა გერმანიის ფედერალური მიწების მთავრობების განზრახვა.
გერმანიაში აკრძალულია არაერთი ნაცისტური ჟესტისა და სიმბოლოს ჩვენება და გამოსახვა. ქვეყანაში ყველაზე ცნობილი აკრძალული სიმბოლო სვასტიკაა.
Z არ არის აკრძალულ ნიშანთა შორის, მაგრამ, როგორც გერმანიის შინაგან საქმეთა სამინისტროს პრესსპიკერმა, მარეკ ვედემ განმარტა, 28 მარტს, „ზოგიერთ შემთხვევაში, მისი გამოყენება შეიძლება ნიშნავდეს რუსული აგრესიის მოწონებას და, შესაბამისად, დაექვემდებაროს გერმანიის სისხლის სამართლის კოდექსის 140-ე მუხლს“.
ეს მუხლი ითვალისწინებს ჯარიმას ან თავისუფლების აღკვეთას სამ წლამდე ვადით.
მარეკ ვედემ განმარტა, რომ რუსეთის აგრესია უკრაინის წინააღმდეგ არის დანაშაული. ეს ნიშნავს, რომ ის, ვინც საჯაროდ აქებს ან ამართლებს მსგავს ქმედებებს, შეიძლება სასამართლოში აღმოჩნდეს.
_______________
ფოტო: ევროპის პრესფოტო სააგენტო. EPA-EFE/SERGEI ILNITSKY
