თურქეთის საგარეო საქმეთა მინისტრის, მევლუთ ჩავუშოღლუს განცხადებით, უკრაინა უსაფრთხოების შესაძლო შეთანხმების გარანტორთა შორის თურქეთის შეყვანის მომხრეა. ამის შესახებ ჩავუშოღლუმ ლვოვში უკრაინის საგარეო საქმეთა მინისტრ დმიტრი კულებასთან შეხვედრის შემდეგ განაცხადა.
ინფორმაციას თურქული სააგენტო „ანადოლუ“ ავრცელებს.
ჩავუშოღლუს თქმით, მოსკოვი არ არის წინააღმდეგი, თურქეთი იყოს უკრაინის უსაფრთხოების შესაძლო შეთანხმებაში ერთ-ერთი გარანტორი.
მან განაცხადა, რომ უსაფრთხოების გარანტიების შესახებ წინადადება გაჟღერდა კიევში ფორმულით: გაეროს უშიშროების საბჭოს ხუთი მუდმივი წევრი ქვეყანა + გერმანია და თურქეთი.
„ჩემი აზრით, ამ ინიციატივას საბოლოო მხარდაჭერა ექნება“, – განაცხადა თურქეთის საგარეო საქმეთა მინისტრმა.
„ამ ომში აუცილებელია სისხლისღვრა რაც შეიძლება მალე შეწყდეს. თურქეთი აქტიურ ძალისხმევას იღებს ამ მიმართულებით“, – ამბობს ჩავუღოღლუ.
მან კიდევ ერთხელ გაუსვა ხაზი, რომ თურქეთი მხარს უჭერს უკრაინის ტერიტორიულ მთლიანობასა და დამოუკიდებლობას:
„მთელი მსოფლიო შეესწრო უკრაინისა და უკრაინელი ხალხის ბრძოლას. ანკარას პოზიცია უკრაინის ტერიტორიული მთლიანობის, დამოუკიდებლობისა და სუვერენიტეტის მხარდაჭერის საკითხზე უცვლელია“, – განაცხადა თურქეთის საგარეო საქმეთა მინისტრმა.
