უკრაინის თავდაცვის სამინისტროს მთავარი სადაზვერვო სამმართველოს ინფორმაციით, პუტინი ტერორისტულ თავდასხმას ამზადებს ჩერნობილის ატომურ ელექტროსადგურზე.
არსებული ინფორმაციით, ვლადიმერ პუტინმა ჩერნობილის ატომურ ელექტროსადგურზე ტერაქტის მომზადების ბრძანება გასცა. „რუსეთის მიერ კონტროლირებადი ჩერნობილის ატომურ ელექტროსადგურზე იგეგმება ადამიანის ჩარევით კატასტროფის შექმნა, რომელზეც ოკუპანტები შეეცდებიან პასუხისმგებლობა უკრაინას დააკისრონ“, – წერს უკრაინის თავდაცვის სამინისტრო.
#DIUinforms
‼ Putin is preparing a terrorist attack on the Chernobyl nuclear power plant ☢️
A man-made catastrophe is planed at the CNPP controlled by Russian forces, for which the occupiers will try to shift responsibility to Ukraine.
More details👉 https://t.co/XclhW1VA0H pic.twitter.com/5f1WdNuoOp— Defence intelligence of Ukraine (@DI_Ukraine) March 11, 2022
„ამჟამად ჩერნობილის ატომური ელექტროსადგური მთლიანად გათიშულია ატომური ენერგიის საერთაშორისო სააგენტოს (IAEA) მონიტორინგის სისტემებიდან. სადგურს გათიშული აქვს ენერგომომარაგება. დიზელ-გენერატორების არსებული რესურსი გათვლილია უსაფრთხოების სისტემების 48-საათიანი უზრუნველყოფისთვის.
ოკუპანტებმა უკრაინელ სპეციალისტებს უარი უთხრეს სადგურზე შესვლასა და სარემონტო სამუშაოების ჩატარებაზე. სამაგიეროდ, იქ ალექსანდრე ლუკაშენკოს დავალებით „ბელორუსი სპეციალისტები“ შევიდნენ. მათ შორის სადგურზე შედიან სპეციალისტების ფორმით რუსი დივერსანტებიც, ტერაქტის მოსაწყობად.
ამასთან, ბოლო დღეებში პუტინის ჯარებმა დაარტყეს ზაპოროჟიეს ატომურ ელექტროსადგურსა და ხარკოვის ფიზიკა-ტექნოლოგიის ინსტიტუტს (სადაც ექსპერიმენტული ბირთვული რეაქტორი მდებარეობს).
ჩერნობილის ავარიაში უკრაინელი სამხედროების მონაწილეობის იმიტაციის მიზნით, ოკუპანტები ცდილობენ შექმნან ყალბი „მტკიცებულებები“ თავიანთი ვერსიის დასადასტურებლად. კერძოდ, გოსტომელში, ანტონოვის აეროპორტის მახლობლად, დაფიქსირდა რუსული მანქანა-მაცივრები, რომლებიც აგროვებდნენ დაღუპული უკრაინელი დამცველების ცხედრებს. არსებობს ვარაუდი, რომ მათ ჩერნობილის ზონაში მოკლულ დივერსანტებად გაასაღებენ“, – წერია განცხადებაში.
უკრაინის თავდაცვის სამინისტროს სადაზვერვო სამმართველო წერს, რომ „სახმელეთო სამხედრო ოპერაციიდან და პირდაპირი მოლაპარაკებებიდან სასურველი შედეგის ვერ მიღების გამო, პუტინი მზადაა მიმართოს მსოფლიო საზოგადოების ბირთვულ შანტაჟს… პუტინის მსგავს ქმედებებს კატასტროფული შედეგები მოჰყვება მთელი მსოფლიოსთვის. როგორც ჩანს, სწორედ ამის იმედი აქვს რუს დიქტატორს, რომელიც მიუღებელ დათმობებს ითხოვს”.
