პატარა ბიჭის ვიდეო, რომელიც მარტო, ტირილით მიდის პოლონეთის საზღვარზე, უკრაინიდან გამოქცეულ ლტოლვილებს შორის, 7 მარტს ვირუსულად გავრცელდა ინტერნეტში. 30-წამიანი ვიდეო, რომელიც თავდაპირველად „როიტერსის“ ლოგოთი გავრცელდა, ბევრმა ცნობილმა მედიასაშუალებამ აჩვენა ეთერში.
ვინ არის ბავშვი, რა ბედი ეწია მას და სად არიან მისი მშობლები? – ამ კითხვებზე პასუხის მიღებას ორი დღე ცდილობდნენ ინტერნეტში.
9 მარტს ბავშვის შესახებ ინფორმაცია გაავრცელა პოლონეთის სასაზღვრო დაცვის დეპარტამენტმა.
დეპარტამენტის ცნობით, უკრაინელ ბავშვს, რომლის ტირილმაც მსოფლიოში მილიონობით ადამიანს მოუკლა გული, ვალერი ჰქვია, იგი 4 წლისაა და პოლონეთის საზღვარი მას მარტო არ გადაუკვეთავს.
„ბიჭი მარტო არ ყოფილა, იგი ოჯახთან ერთად იყო. მან საზღვარი 5 მარტს, 09:33 საათზე გადაკვეთა დედასთან, ბებიასთან და ძმასთან ერთად. 4 წლის ვალერიმ ოფიცრებისგან ტკბილეული მიიღო. ღიმილიანი და მხიარული იყო“ – ამბობს სასაზღვრო დაცვის დეპარტამენტის პრესსპიკერი, პიოტრ ზაკიელარცი პოლონურ გამოცემა wyborcza-სთან. პრესსპიკერი ამბობს, რომ ბავშვი ოჯახთან ერთად პოლონეთში იმყოფება.
უკრაინელი ბავშვი ამ ფოტოზე უკვე იღიმის. პოლონელი მესაზღვრეები ამბობენ, რომ მას ტკბილეულით გაუმასპინძლდნენ.
რუსეთის უკრაინაზე თავდასხმის შედეგად 2 მილიონზე მეტი უკრაინელი ლტოლვილად იქცა. ყველაზე მეტი უკრაინელი ლტოლვილი პოლონეთის საზღვარს კვეთს. ძირითადად ქვეყანას ტოვებენ ქალები, ბავშვები, მოხუცები, შშმ პირები. საზღვრებიდან ათასობით ფოტო და ვიდეო ვრცელდება, რომლებიც უკრაინელ ლტოლვილთა გზას ასახავს.
ამავე თემაზე:
https://batumelebi.netgazeti.ge/news/395268/
