ბათუმისა და ლაზეთის მიტროპოლიტმა დიმიტრი შიოლაშვილმა ქადაგების დროს უკრაინელ ხალხს სოლიდარობა გამოუცხადა და პუტინს ბოროტმოქმედი უწოდა.
„შეძრწუნებული ვართ იმ ბოროტებით, რაც ხდება უკრაინაში და თანავუგრძნობ ამ მედგარ, მტკიცე ნებისყოფის ხალხს. ღმერთმა მისცეს მათ სიმხნევე და სიმტკიცე,
გამოჩნდა ერთი ბოროტმოქმედი მმართველი, რომელიც მთელ კაცობრიობას ბირთვული იარაღის ჟღარუნით ემუქრება და თავის თავს ის მიიჩნევს ქრისტიანად და მე ვიტყოდი, რომ მას [პუტინს], ქრისტიანულ ფასეულობებთან საერთო არაფერი არ აქვს.
როცა ის მთელი სიამოვნებით მთელ მსოფლიოს უცხადებს, ეუბნება, რომ თვალის დახამხამებას ვერ მოასწრებთ, თუ ბირთვულ იარაღს გამოვიყენებო, იმას არაფერი არ აქვს ქრისტიანობასთან საერთო, რადგან ის ემუქრება ჩვენს ქვეყანას, ის ემუქრება შენს ქვეყანას, ის ემუქრება ჩვენს შვილებს, თქვენს შვილებს და კაცობრიობას, თავისთავად.“ – ამბობს მიტროპოლიტი დიმიტრი.
მან ასევე აღნიშნა, რომ გარკვეული პერიოდი რუსეთში სწავლობდა და თანაკურსელებს უკრაინაში მიმდინარე ომის გამო დაუკავშირდა და მიმართა.
„ჩვენ ვხედავთ როგორ ნადგურდება და ინგრევა ყველაფერი, იხოცებიან ქალები, ბავშვები… ზოგიერთ ჩემს თანაკურსელს რუსეთში გავუგზავნე შეტყობინება, რომ თქვენ უნდა შეაჩეროთ ეს ბოროტმოქმედი და ამხილოთ, რადგან ის დაბომბავს რუსეთს. უკიდურეს შემთხვევაში, მე თქვენთან გამიჭირდება ურთიერთობა. სამწუხაროდ, არანაირი პასუხი მათგან არ არის.
მე მაქვს ყოველდღიური ურთიერთობა უკრაინაში მეგობრებთან, ახლობლებთან და თვალცრემლიანი ვემშვიდობებით ერთმანეთს. განადგურებულია ზოგიერთი ეპარქია და ძალიან გულნატკენი არიან რუსეთის საპატრიარქოს დაქვემდებარებაში არსებული ეპარქიები, რადგან თავიანთმა პატრიარქმა გაამართლა ბოროტმოქმედება და უწოდა რუსეთის ინტერესების დაცვა.“-ამბობს დიმიტრი შიოლაშვილი.
