კრიპტოვალუტის სავაჭრო პლატფორმა Coinbase-მა რუსეთთან დაკავშირებული 25 000 საფულის მისამართი დაბლოკა.
პლატფორმის თქმით, მისამართები დაკავშირებული იყო რუს პირებთან ან სუბიექტებთან, რომლებიც, სავარაუდოდ, უკანონო საქმიანობაში იყვნენ ჩართულნი.
მისამართები დაიბლოკა იმის შიშით, რომ კრიპტოვალუტა შეიძლება გამოყენებული იქნას სანქციების თავიდან ასაცილებლად.
Coinbase-ის მთავარმა იურიდიულმა ოფიცერმა, პოლ გრევალმა, განცხადება კომპანიის ბლოგზე გამოაქვეყნა. მან ხაზი გაუსვა, თუ როგორ ემორჩილებოდა კრიპტო ბირჟა ახალ წესებს, რომლებიც დაწესებულია რუსეთის მიერ უკრაინაში შეჭრის გამო.
„Coinbase ბლოკავს 25000-ზე მეტ მისამართს, რომლებიც დაკავშირებულია რუს ფიზიკურ პირებთან ან მეწარმეებთან, რომლებიც ჩვენი ინფორმაციით მონაწილეობენ უკანონო საქმიანობაში. ბევრი მათგანი აღმოვაჩინეთ ჩვენი პროაქტიული გამოძიების შედეგად“, – წერს გრევალი.
მისივე თქმით, კომპანიამ აშშ-ის მთავრობას მიაწოდა მათ ხელთ არსებული მონაცემები დამატებითი სანქციების დაწესების მხარდასაჭერად: „სანქციები მნიშვნელოვან როლს თამაშობს ეროვნული უსაფრთხოების ხელშეწყობასა და უკანონო აგრესიის შეკავებაში. Coinbase სრულად უჭერს მხარს ხელისუფლების ამ ძალისხმევას“.
როგორც BBC-ი წერს, აშშ-ის მთავრობამ კრიპტო პლატფორმებს სთხოვა დახმარება, რუსი ოლიგარქების მიერ ვირტუალური ვალუტის გამოყენებით სანქციებისთვის თავის არიდების პრევენციაში.
მაგრამ ბევრი წინააღმდეგობას უწევს როგორც უკრაინის მთავრობის, ასევე აშშ-ისა და ევროპელი პოლიტიკოსების ზეწოლას – უფრო შორს წავიდნენ და აკრძალონ ყველა რუსი მომხმარებელი. აღნიშნული კომპანიები წინააღმდეგობის მიზეზად რუსეთის რიგითი მოქალაქეების დაზარალების საფრთხეს ასახელებენ, რუბლის რეკორდული გაუფასურების შემდეგ.
Coinbase-ის თანადამფუძნებელი და გენერალური დირექტორი, ბრაიან არმსტრონგი, ტვიტერზე განმარტების სახით წერს, რომ კანონი აშშ-ს ყველა მოქალაქისა და ბიზნესისთვის ერთნაირია და მათი კომპანია დაემორჩილება მას, მათ შორის, სანქციების ნაწილშიც. თუმცა მანამ აშშ-ის მთავრობას მსგავსი ბრძანება არ გაუცია, არ აპირებენ წინასწარ დაბლოკონ ყველა რუსი მომხმარებელი:
„გვჯერა, რომ ყველა იმსახურებს წვდომას ძირითად ფინანსურ სერვისებზე, თუ კანონი სხვა რამეს არ ითვალისწინებს. ზოგიერთი რიგითი რუსი იყენებს კრიპტოვალუტას, როგორც სამაშველო რგოლს ახლა, როდესაც მათმა ვალუტამ კოლაფსი განიცადა. სავარაუდოდ, ბევრი მათგანი ეწინააღმდეგება იმას, რასაც მათი ქვეყანა აკეთებს და მსგავსი აკრძალვა მათაც დააზარალებს.“
გაერთიანებული სამეფოს საგარეო საქმეთა მინისტრის, ლიზ ტრასის განცხადებით, დასავლეთმა ფინანსური სისტემა SWIFT-იდან ყველა რუსული ბანკი უნდა გააძევოს.
„როიტერსის“ ინფორმაციით კი, ევროკომისიამ რუსეთისა და ბელარუსის წინააღმდეგ სანქციების ახალი პაკეტი მოამზადა. გამოცემა წერს, რომ დოკუმენტი დამატებით ითვალისწინებს რუსი ოლიგარქებისა და პოლიტიკოსების, ასევე, სამი ბელარუსული ბანკის სანქცირებას.
______
ფოტო: New York Post
