მთავარი,სიახლეები

„ბოლო 2 ღამე კოშმარი გამოვიარეთ, გადავრჩით“ – ქართველი მებრძოლი უკრაინაში

08.03.2022 • 5386
„ბოლო 2 ღამე კოშმარი გამოვიარეთ, გადავრჩით“ – ქართველი მებრძოლი უკრაინაში

„რუსეთი ამ ომს ვერ მოიგებს, ეს გამორიცხულია,“ – კატეგორიული შეფასება ჩამოუყალიბა გურამ ჩალაგაშვილს რუსეთ-უკრაინის ომში მონაწილეობამ, ორმა დღემ და ღამემ, როცა სამხედრო გამოცდილების არმქონე კაცს პირდაპირ ცხელ წერტილში მოუხდა ბრძოლა.

„ბოლო ორი ღამე კოშმარი გამოვიარეთ, გადავრჩით,“ – გვიყვება გურამ ჩალაგაშვილი. – „ინტენსიურ სროლებში მოვყევით, არტილერია და ჰაერი მუშაობდა აქტიურად, ასეულობით ჭურვი გამოუშვეს ჩვენი მიმართულებით. ეცადნენ, რომ ალყაში მოვექციეთ, კომუნიკაციაც დაგვიხშეს, მოკლედ მძიმე ვითარება იყო…

საბოლოოდ, იმ კონკრეტულ ლოკაციაზე ოკუპანტებმა დაკარგეს ორი თუ სამი მძიმე ტექნიკა, ასევე 70 ადამიანი, ჩვენს მხარეს კი, მხოლოდ ორი დაიჭრა მსუბუქად… ერთ-ერთის ახლოს ჭურვი აფეთქდა და სანგარში დროულად ჩაწოლა ვერ მოასწრო, ტვინის შერყევა მიიღო.

სამწუხაროდ, ერთ-ერთ ბლოგპოსტზე სამი უკრაინელი მოგვიკლეს. იქ ჩვენც ვიყავით მანამდე, შემდეგ გადავინაცვლეთ უფრო ცხელ წერტილში, ამ დილით ჩაცხრილულები დაგვხდნენ სანგრებში, ჩუმად მიპარვიათ, როგორც ჩანს,“ – გვითხრა გურამ ჩალაგაშვილმა.

ქართველი მებრძოლის თქმით, უკრაინელმა სამხედროებმა ქართველი მოხალისეებისგან, მათ შორის, სამხედრო გამოცდილების მქონე პირებისგან ცალკე ბატალიონი შექმნეს.

„ჩვენ უკრაინაში ჩავედით 8 მეგობარი ერთად, მათ შორის, ირაკლი ოქრუაშვილი, საზღვართან დაგვხდნენ უკრაინელი მეგობრები და მიგვიყვანეს სამხედრო ბაზაზე. ბაზაზე იყვნენ ქართველი მებრძოლებიც, რომლებმაც გამოთქვეს სურვილი ერთად გვებრძოლა. საბოლოოდ 26-კაციანი ბატალიონი შევკარით, ერთი ლატვიელი შემოგვიერთდა და ერთი აზერბაიჯანელი. ბატალიონის უფროსი ომარ მეტრეველია, გამოცდილი სპეცრაზმელი და მეომარი…

უკრაინელი გამოცდილი მეომარიცაა ჩვენთან ერთად. ის გვეუბნება, სად უნდა წავიდეთ. გვითხრა, რომ გზაში გვეტყვიან, სად მივდივართ, ამას უკრაინელები წყვეტენ, რა და როგორ,“ – ამბობს გურამ ჩალაგაშვილი.

მოხალისეებს საქართველოდან განსაკუთრებით უკრაინელების შემართება მოსწონთ.

„ყველა 100 მეტრში ბლოგპოსტია მოწყობილი, ქალებიც დგანან ავტომატებით ხელში, ყველა უკრაინელი ომობს…“ – დასძინა გურამ ჩალაგაშვილმა. მისი დაკვირვებით, უკრაინას ყველაზე მეტად სამხედრო აღჭურვილობით სჭირდება დახმარება.

„სჭირდებათ უფრო მეტი იარაღი, თანამედროვე ტექნოლოგიები, ოპერატორები, ჯაველინები… რუსეთი კიევის სიახლოვესაც ვერ მოვა. მითი უძლეველ რუსეთზე დასრულდა მთლიანად.

ფაქტია, რომ ეს საქართველოს ბრძოლაცაა. ეჭვი არ მეპარება იმაში, რომ თუ უკრაინა ომს წააგებს, ჩვენ 15 წუთში გადაგვყლაპავს რუსეთი. არც დასჭირდებათ გადაყლაპვა, ისეთი ხელისუფლება გვყავს,“ – აღნიშნა გურამ ჩალაგაშვილმა „ბათუმელებთან“.

————–

8 მარტი უკრაინაში რუსეთის ფედერაციის ჯარების შეჭრიდან მე-13 დღეა. რუსეთმა დაბომბა ქალაქებიც, დაღუპულია ასობით მშვიდობიანი მოქალაქე. ძირითადად ევროკავშირის ქვეყნების მიმართულებით ქვეყანა დატოვა 2 მილიონზე მეტმა ადამიანმა. ეს არის მეორე მსოფლიო ომის შემდეგ ევროპაში ყველაზე მასშტაბური და სწრაფი ლტოლვილთა კრიზისი.

მთავარი ფოტო: გურამ ჩალაგაშვილი

გადაბეჭდვის წესი


ასევე: