„ღია საზოგადოების ფონდმა“ უკრაინაში სამოქალაქო საზოგადოებისა და მედიის მხარდასაჭერად „უკრაინის დემოკრატიის ფონდი“ დააფუძნა და საწყის შენატანად 25 მილიონი ამერიკული დოლარი გამოყო.
„მოვუწოდებთ სხვა დამფინანსებლებს, რუსეთის პრეზიდენტის, ვლადიმერ პუტინის, დემოკრატიაზე თავდასხმის საპასუხოდ, შემოგვიერთდით უკრაინაში სამოქალაქო საზოგადოების მხარდასაჭერად.
ეს ინიციატივა ეფუძნება „ღია საზოგადოების ფონდის“ მიერ სამ ათწლეულზე მეტი ხნის განმავლობაში აღმოსავლეთ ევროპაში განხორციელებულ საქმიანობას უფლებადამცველი ორგანიზაციების, დამოუკიდებელი ჟურნალისტებისა და სამოქალაქო საზოგადოების სხვა ჯგუფების მხარდასაჭერად.
ფონდის მიზანია მიმდინარე კრიზისისა და მისი გარდაუვალი ხანგრძლივი შედეგების გამო კერძო ფონდებთან, მსხვილ და წვრილ ფილანთროპებსა და კერძო სექტორთან ერთად შეაგროვოს 100 მილიონი ამერიკული დოლარი.
„ჩვენ გვაქვს ერთი მარტივი გზავნილი: არასდროს მივატოვებთ უკრაინას,“ – თქვა „ღია საზოგადოების ფონდის“ თავმჯდომარის მოადგილემ, ალექს სოროსმა. – სანამ პუტინი ცდილობს რუკიდან გააქროს ქვეყანა (უკრაინა), ჩვენ გავაკეთებთ ყველაფერს, რისი გაკეთებაც უკრაინელი ხალხისთვის შეგვიძლია. მოვუწოდებთ სხვებს, გადმოდგან ნაბიჯი და შემოგვიერთდნენ “.
„ეს ღია საზოგადოებებისთვის გადამწყვეტი მომენტია. რასაც არ უნდა ამბობდეს კრემლი, ცხადია, რომ ის, რისიც პუტინს ეშინია, არის არა ნატო ან ბირთვული იარაღი, არამედ თავისუფალი და აყვავებული დემოკრატია მის კართან,“ – აღნიშნავს ფონდის პრეზიდენტი, მარკ მალოქ-ბრაუნი.
ფონდი მოემსახურება სამ მიზანს:
- უკრაინის სამოქალაქო საზოგადოების მხარდაჭერა: 1990 წლიდან დამოუკიდებელმა უკრაინულმა ორგანიზაციებმა ითამაშეს სასიცოცხლო როლი ქვეყნის დემოკრატიულ განვითარებაში – კორუფციასთან ბრძოლით დაწყებული, დამოუკიდებელი მედიისა და მოქალაქეების უფლებების დაცვამდე. ეს ჯგუფები ნებისმიერი ჯანსაღი დემოკრატიის საყრდენია. მიმდინარე კონფლიქტისა და მის შემდგომ პერიოდში ფონდი გააგრძელებს ამ საქმიანობის მხარდაჭერას, რომელიც ახლა უფრო კრიტიკულია, ვიდრე ოდესმე.
- საერთაშორისო სოლიდარობა უკრაინას: ფონდი გაიღებს საერთაშორისო ძალისხმევას უკრაინის თავისუფლებისა და დამოუკიდებლობის დასაცავად, ავტორიტარიზმთან ბრძოლისა და ომის დანაშაულის შესახებ სანდო დოკუმენტების მოძიების მეშვებოთ საერთაშორისო პასუხისმგებლობის გასაძლიერებლად. ეს მოიცავს რესურსებს გამომძიებელი ჟურნალისტებისთვის, ხელოვანებისა და მეცნიერებისთვის, ასევე, კვლევებსა და ადვოკატირებას იმ ჯგუფებისთვის, რომლებიც საუბრობენ ადამიანის უფლებებსა და კანონის უზენაესობაზე რეგიონში.
- ადამიანური ღირსების დაცვა: დღეის მდგომარეობით, მილიონზე მეტი ადამიანი იძულებული გახდა დაეტოვებინა უკრაინა. კიდევ უფრო მეტი იძულებული გახდა მიეტოვებინა საცხოვრებელი და გადაადგილებულიყო ქვეყნის შიგნით. მშვიდობიან მოსახლეობას წინ კიდევ დამატებითი გაუთვალისწინებელი საფრთხეები ელის. ფონდი მხარს დაუჭერს ჰუმანიტარულ დახმარებას მათთვის, ვინც სხვა დახმარების მიღმა აღმოჩნდა, ასევე გააძლიერებს საზოგადოებრივი ჯანდაცვის მუშაობას, ლტოლვილების დაცვასა და მიღებას. საბოლოოდ კი, ხელს შეუწყობს პოსტკონფლიქტურ რეკონსტრუქციას.
„ეს იყო საშინელებათა დრო უკრაინაში.“ – თქვა ოლექსანდრ სუშკომ, კიევში დაფუძნებული „საერთაშორისო რენესანსის ფონდის“ აღმასრულებელმა დირექტორიმა. – „ამავდროულად, მე ვგრძნობ დიდ სიამაყეს, როდესაც ვხედავ, როგორ დგას უკრაინა, ევროპა და მსოფლიოს დიდი ნაწილი პუტინის აგრესიის წინააღმდეგ. ჩვენ გავაგრძელებთ თავისუფლებისა და დემოკრატიის საფუძვლების დაცვას აქ და მთელ მსოფლიოში.”
ჯორჯ სოროსის მიერ დაარსებული „ღია საზოგადოების ფონდი“ არის სამართლიანობისთვის, დემოკრატიული მმართველობისა და ადამიანის უფლებებისთვის მომუშავე დამოუკიდებელი ჯგუფების ყველაზე მსხვილი კერძო დამფინანსებელი მსოფლიოში. „ღია საზოგადოების ფონდი“ უკრაინაში 1990 წლიდან მუშაობს „საერთაშორისო რენესანსის ფონდის“ მეშვეობით.
