დღეს, პირველ მარტს, საქართველოს პარლამენტში გამოსვლისას დეპუტატი არმაზ ახვლედიანი უკრაინასთან დაკავშირებით პრემიერის განცხადებებს გამოეხმაურა.
„როცა პრემიერ-მინისტრს ვუსმენ, მეჩვენება, რომ ის არ საუბრობს საკუთარი ქვეყნის სახელით და ძალიან ვწუხვარ ამის გამო. სულ არ მიხარია. ვფიქრობ, „ოცნებაში“ შესაძლოა ყველა არა, მაგრამ არიან ადამიანები, ვინც ამას განიცდიან, ხვდებიან, რომ ეს არ არის საქართველოს ხმა, ეს არ არის საქართველოს პოზიცია.
ჩვენ უნდა დავარქვათ ყველაფერს თავისი სახელი. არ მოგვერიდოს, არც შეგვეშინდეს. კრემლი და მისი მესვეური 21-ე საუკუნის პირსისხლიანი დიქტატორია, რომელმაც ამ დღეში ჩააგდო უკრაინელი ხალხი და მთელი მსოფლიო. ჩვენ უნდა ვიცოდეთ, რომ ამ დღეში ვართ ჩვენც, კრემლის გამო.
ერთადერთი გამოსავალი ნატოში, ევროკავშირში საქართველოს გაწევრიანების დაჩქარებული პროცედურის გზა არის ის, რომ დღეს მყარად, უკანმოუხედავად ვიყოთ უკრაინასთან და უკრაინელებთან ერთად,“ – ამბობს არმაზ ახვლედიანი.
მისი თქმით, საქართველომ დღეს, როგორც არასდროს, უნდა იფიქროს საკუთარ გასაჭირზე:
„კოჭლ დემოკრატიაზე, ფაქტობრივად, არარსებულ სამართლიან სასამართლოზე და თუ ამ საკითხებს მოვაგვარებთ და ვისწავლით ერთმანეთთან ურთიერთობის კულტურას, გარწმუნებთ, რომ საქართველოც უკრაინასთან ერთად შეძლებს დაჩქარებულად გაწევრიანებას ევროკავშირში და ჩვენც გაცილებით დაცული ვიქნებით საფრთხეებისგან.“ – ამბობს არმაზ ახვლედიანი.
