დღეს, 25 თებერვალს, გაეროს ადამიანის უფლებათა უმაღლესი კომისრის პრესსპიკერმა რავინა შამდასანიმ ჟენევაში გამართულ ბრიფინგზე განაცხადა, რომ უცნობია რუსეთში დაკავებული აქციის მონაწილეების ახლანდელი მდგომარეობა. მისივე განცხადებით, რუსეთის მოქალაქეებს ამ დაკავებებით შეეზღუდათ პროტესტის მშვიდობიანად გამოხატვის ლეგიტიმური უფლება.
დღევანდელი მონაცემებით რუსეთში ანტისაომარი აქციის 1800-ზე მეტი მონაწილეა დაკავებული.
პრესსპიკერმა რუსეთის ხელისუფლებას დაკავებულთა დაუყოვნებლივ გათავისუფლებისკენ მოუწოდა, რათა მათ შეძლონ საკუთარი უფლებების ფარგლებში პროტესტის გამოხატვა.
გაეროს ადამიანის უფლებათა უმაღლესი კომისრის პრესსპიკერი ხაზს უსვამს, რომ პროტესტის გამოხატვის უფლებით სარგებლობისთვის ადამიანების დაკავება მათი თავისუფლების უკანონოდ აღკვეთას ნიშნავს.
მეორე დღეა რუსეთმა უკრაინის წინააღმდეგ სრულმასშტაბიანი ომი დაიწყო. რუსული ჯარები უკრაინაში სამი მხრიდან შეიჭრნენ — აღმოსავლეთიდან (ბელარუსი), ჩრდილოეთიდან (დონეცკი-ლუგანსკი) და სამხრეთიდან (ყირიმი).
პარალელურად, არტილერია და ავიაცია ბომბავს უკრაინის ქალაქებს, მათ შორის, დედაქალაქ კიევს. რუსეთის პრეზიდენტი ვლადიმირ პუტინი აცხადებს, რომ მათი მიზანი „უკრაინის დემილიტარიზაცია და დენაციფიკაციაა“.
ომის საწინააღმდეგო საპროტესტო აქციები გაიმართა რუსეთის ფედერაციის რამდენიმე ქალაქში, მათ შორის მოსკოვში, ეკატერინბურგსა და პეტერბურგში.
