მთავარი,სიახლეები

„იცოდნენ რუსებმა, რომ ჩვენი მიწებიდან არსად წავალთ“ – უკრაინის მოქალაქე

25.02.2022 • 1745
„იცოდნენ რუსებმა, რომ ჩვენი მიწებიდან არსად წავალთ“ – უკრაინის მოქალაქე

კრისტინა პატრებჩუკი უკრაინის მოქალაქეა. ის შვილებთან და მეუღლესთან ერთად რამდენიმე წელია ბათუმში ცხოვრობს. 2014 წლის რუსეთ-უკრაინის ომის შემდეგ ოჯახმა ქვეყანა დატოვა და საქართველოში ჩამოვიდა. უკრაინის ქალაქების დაბომბვა რუსეთმა 24 თებერვალს დაიწყო. საოკუპაციო ბრძოლები გრძელდება დღესაც. კრისტინა დილიდან ვეღარ უკავშირდება ნათესავებს უკრაინაში.

„ვურეკავთ კიევში ახლობლებს და კონტაქტი აღარ არის. ისინი კიევის იმ ნაწილში ცხოვრობენ, სადაც რუსული ტექნიკა იყო შესული და ისვრიდნენ. კიევში არიან ახლა ჩემი მეუღლის მშობლები, ბიძა, ჩემი მაზლი თავისი ოჯახით. კონტაქტი გაწყდა,“ – ამბობს უკრაინის მოქალაქე.

კრისტინას ოჯახი, მისი მშობლები და ნათესავები, რუსების მიერ ოკუპირებული დონეცკის ოლქის ქალაქ გორლოვკაში რჩებიან. დონეცკი ე.წ. დამოუკიდებელ რესპუბლიკად რუსეთმა 4 დღის წინ, 21 თებერვალს, ცნო.

„მიუხედავად იმისა, რომ დონეცკი ოკუპირებულია რუსების მიერ, ძალიან ბევრ ხალხს ვიცნობ პირადად მე გორლოვკაში, ვინც ელოდება უკრაინას, უყვარს უკრაინა და უცდის, როდის გამოიხსნიან მათ.

იქ ხალხს ეშინია, ვერაფერს ამბობენ, რადგან სარდაფებში აწამებენ რუსეთის მოწინააღმდეგეებს. თუ იქ ცხოვრობ, უნდა იყო ე.წ. დონეცკის დამოუკიდებელი რესპუბლიკის, ანუ რუსეთის მხარეს და თუ არ ხარ მათკენ, გკლავენ. წამების და სიკვდილის შიშით ხალხი ამაზე ვერ ლაპარაკობს. მჯერა, უკრაინა შეძლებს გაათავისუფლოს დონეცკის და ლუგანსკის ოკუპირებული ტერიტორიები.

იცოდნენ რუსებმა, რომ ჩვენი მიწებიდან არსად წავალთ და შურს ვიძიებთ, არანაირი პატიება და შერიგება მათთან არ იქნება. ტერორისტებთან მოსალაპარაკებლად არ სხდებიან.

გუშინ ვნახე კადრები, როგორ გამოდიან პეტერბურგელები უკრაინის ომის წინააღმდეგ. თუ რუსეთში მილიონობით ადამიანი გამოვა ქუჩაში პუტინის შესაჩერებლად, შესაძლებელია რაიმე შეიცვალოს, მაგრამ ათასობით მოქალაქე ვერაფერს შეცვლის 140-მილიონიან რუსეთში.

ჩვენ არ გვჭირდება სხვისი მიწები, მათ ვჭირდებით და გვიტევენ, გვბომბავენ, გვკლავენ. ახლა კიევში უამრავი რუსი მსახიობი, მომღერალი, „ვარსკვლავია“, ისინი ჩანაწერებსაც აკეთებენ კიევიდან და მათ არავინ ეხება, მიუხედავად იმისა, რომ ეს ხალხი ახლა უკრაინელებს ხოცავს.

ძალიან ბევრი მოღალატეც გვყავს. გვიტევენ ცრუ ინფორმაციითაც. რაც ზუსტად ვიცი არის ის, რომ გვბომბავს რუსეთი და იღუპებიან როგორც მებრძოლები, ასევე იღუპება მშვიდობიანი მოსახლეობა,“ – ამბობს კრისტინა პატრებჩუკი.

გადაბეჭდვის წესი


ასევე: